ՅՈՒՆԵՍԿՕ-ի գլխավոր տնօրեն Իրինա Բոկովան վճռականորեն դատապարտել է սիրիական Պալմիրա քաղաքում Բաալ Շամին հին տաճարի ավերումը՝ դա անվանելով հանցագործություն քաղաքակրթության դեմ: Այս մասին հաղորդվում է կազմակերպության կայքում:
«Սիրիայի մշակութային բազմազանությունը մարմնավորող մշակութային խորհրդանիշների համակարգված ավերումը բացահայտում է այդպիսի հարձակումների իրական նպատակը, որն է՝ Սիրիայի ժողովրդին գիտելիքներից, ինքնությունից ու պատմությունից զրկելը: Բաալ Շամին տաճարի ավերումը… նոր ռազմական հանցագործություն և հսկայական կորուստ է Սիրիայի ժողովրդի և ողջ մարդկության համար»,- ասվում է բոկովայի հայտարարության մեջ:
Կիրակի ԴԱԻՇ-ի գրոհայինները պայթյուն են կազմակերպել Պալմիրայի տարածքում, ինչի հետևանքով մասամբ ավերվել է Բաալ-Շամին տաճարը, որը հին քաղաքի գլխավոր սրբավայրերից է:
Բոկովան նշել է, որ ծայրահեղականները ձգտում են ոչնչացնել սիրիացի ժողովրդի մշակույթի բազմազանությունն ու հարստությունը, և միջազգային հանրությանը կոչ է արել միավորվել չդադարող մշակութային մաքրումների դեմ պայքարում:
Նրա խոսքով՝ մշակութային հուշարձանների ոչնչացումը որակվում է որպես ռազմական հանցագործություն, իսկ մեղավորները պետք է պատասխանատվության ենթարկվեն:
«ՅՈՒՆԵՍԿՕ-ն Սիրիայի ժողովրդին աջակցում է իր ժառանգության պահպանմանն ուղղված նրա ջանքերում, որը ողջ մարդկության սեփականությունն է»,- նշել է Բոկովան: