Առաքել Մովսիսյանի՝ ամիսներ առաջ հնչեցրած սպառնալիքների հետ կապված՝ այսօր ԱԺ Էթիկայի հանձնաժողովը որոշեց վարույթ ընդունել Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի ներկայացրած դիմումը։
«Էթիկայի հանձնաժողովն ուներ դիմում իր վարույթում, մեկ նպատակով, որպեսզի որոշի, թե արդյոք առկա են օրենքով սահմանված հիմքերը, հանձնաժողովին ուղղված դիմումը մերժելու կամ վարույթ ընդունելու համար։ Հանձնաժողովը միաձայն որոշում կայացրեց, որ մերժման հիմքերի բացակայությամբ, դիմումում նշված փաստերի առկայության պայմաններում տվյալ դիմումը ենթակա է Էթիկայի հանձնաժողովի քննարկմանը, և ընդունվեց վարույթ։ Այդ հարցով զեկուցող է նշանակվել Թևան Պողոսյանը»,- այսօր «Առաջին լրատվական»-ի հետ զրույցում ասաց ԱԺ ՀՀԿ խմբակցության պատգամավոր, էթիկայի հանձնաժողովի նախագահ Արփինե Հովհաննիսյանը։
Անդրադառնալով վարույթ ընդունելու հիմքերին՝ Արփինե Հովհաննիսյանը նշեց, որ ԱԺ կանոնակարգ օրենքի համաձայն՝ Էթիկայի հանձնաժողովի նախագահը հանձնաժողովին ներկայացնում է այն մասին, թե արդյոք առկա են դիմումում նշված փաստերը, նաև փաստերի հիման վրա մերժման հիմքերը։ Մերժման հիմքերի բացակայության դեպքում, այն համարվում է վարույթ ընդունված։
Այս հայտարարությունները, նրա խոսքով, քննելու կարիք կար, և դրանք ենթակա էին էթիկայի հանձնաժողովի եզրակացությանը։
Այսինքն ՀՀԿ-ական պատգմավորն էթիկապես սխալ արա՞րք է կատարել. այս հարցին պատգամավորը պատախանեց.
«Ո՛չ, այս պահի դրությամբ հանձնաժողովը ոչ թե այդպիսի եզրակացություն է կայացրել, այլ վերաբերում էր նրան, որ էթիկայի հանձնաժողովի իրավասության շրջանակներում է քննել այն հարցերը, որոնք իր դիմումի մեջ բարձրացրել է դիմումատուն, որից հետո միայն կարելի է որոշում կայացնել, թե արդյոք դիմումատուի նշած որևէ կետով էթիկայի խախտում կա, թե ոչ։ Այսինքն՝ հաջորդող նիստերի ընթացքում որոշում կկայացվի, թե դիմումատուի նշած որ կետերով խախտում կա, որով ոչ»։
Իսկ եթե նույն պատգամավորի դեպքում նման դեպքերը պարբերական բնույթ են կրում, դա ինչ պատասխանատվություն է ենթադրում. այս հարցին Արփինե Հովհաննիսյանը պատասխանեց.
«Եթե խոսքը վերաբերում է էթիկայի հանձնաժողովի եզրակացությանը կամ հանձնաժողովի իրավասության շրջանակներում գտնվող այլ ընթացակարգի, ապա ԱԺ կանոնակարգ օրենքը սահմանում է, որ յուրաքանչյուր կոնկրետ դիմումի դեպքում էթիկայի հանձնաժողովը պետք է քննարկի՝ ընդունել վարույթ, թե ոչ։ Այնուհետև վարույթ ընդունած դիմումի վերաբերյալ կա էթիկայի խախտում, թե ոչ»։
