Haqqin.az պորտալի փոխանցմամբ՝ Ադրբեջանի խոշորագույն արդյունաբերական օբյեկտ հանդիսացող «Սումգայիթի տեխնոլոգիական պարկը» բախվել է ֆինանսական խնդիրների և զանգվածաբար հեռացնում է իր աշխատակիցներին։ Առկա տեղեկատվության համաձայն՝ արդյունաբերական համալիրի մեջ մտնող մի շարք գործարաններ արդեն իսկ կասեցրել են իրենց գործունեությունը։
Աշխատակիցները, ովքեր դժգոհել են աշխատավարձի ձգձգումից, կրճատումների պատրվակով հեռացվել են աշխատանքից։ Նմանատիպ իրավիճակ է տիրում Azenco ձեռնարկությունում, որը զբաղվում է էներգետիկ և ենթակառուցվածքային մի շարք այլ օբյեկտների կառուցմամբ։ Այս դեպքում աշխատակիցների կրճատումը պատճառաբանում են պետական նոր պատվերների բացակայությամբ։
Ներկայումս իրենց աշխատանքները դադարեցրել են ևս երկու արդյունաբերական հսկաներ՝ Սումգայիթի ալյումինի ու խողովակների գործարանները։
Ավելի վաղ հաղորդվել էր, որ այսօր Իլհամ Ալիևի գլխավորությամբ գումարվելու է կառավարության արտակարգ նիստ՝ քննարկելու համար տնտեսական խնդիրները։
