Ամերիկյան The Washington Post թերթի փոխանցմամբ՝ իրանցիները սկսել են մաքրել Թեհրանում ԱՄՆ դեսպանատան պատին արված հակաամերիկյան գրությունը։ Խոսքը մասնավորապես «Մա՛հ Ամերիկային» կարգախոսի մասին է, որը կարող է շատ զգայուն քաղաքական ազդանշան լինել և խորհրդանշել նոր ժամանակաշրջանի գալուստը։
Իրանցիների մեծ մասն աջակցություն է հայտնել հուլիսին Իրանի ու «Վեցյակի» միջև ձեռք բերված միջուկային համաձայնագրին, որը վերջին հաշվով կարող է հանգեցնել Վաշինգտոնի հետ ավելի լավ հարաբերությունների։ Իրանի և ԱՄՆ-ի միջև դիվանագիտական հարաբերությունները պաշտոնապես խզվել են 1980 թվականի ապրիլին՝ 1979 թվականին Իրանում իրականացված իսլամական հեղափոխությունից հետո։
Հիշեցնենք, որ սրանից առաջ Թեհրանում վերաբացվել էր Մեծ Բրիտանիայի դեսպանատունը, որին ներկա է եղել Մեծ Բրիտանիայի արտգործնախարար Ֆիլիպ Համոնդը։ ԶԼՄ-ների ուշադրությունից չէր վրիպել, որ Թեհրանում վերաբացված բրիտանական դեսպանատան պատին (2011 թվականից) գրված է եղել «Մա՛հ Անգլիային»։
Օգոստոսի վերջերին ԱՄՆ պետդեպարտամենտի պաշտոնական ներկայացուցիչ Ջոն Կիրբին, մեկնաբանելով Իրանում Մեծ Բրիտանիայի դեսպանատան վերաբացումը, հայտարարեց, որ ԱՄՆ-ը մտադիր չէ դեսպանատուն բացել Իրանում։