ԿԳ նախարար Արմեն Աշոտյանը նոր ուսումնական տարին դիմավորեց իր հայրենի՝ թիվ 45 հիմնական դպրոցում:
«Առաջին լրատվական»-ը նախարարից հետաքրքրվեց՝ նոր ուսումնական տարում ի՞նչ խնդիրներ կան չհաղթահարած: Նա նշեց, որ այս ուսումնական տարին դեռ չլուծված որոշ հին խնդիրների և նոր ծրագրերի տարի է:
«Կրթության ոլորտում խնդիրները բազում են: Այդ խնդիրների մասին խոսում ենք և փորձում լուծել ողջ տարվա ընթացքում: Այսօր հանրապետության գուցե ամենաուրախ օրերից մեկն է, և գրեթե չկա օջախ, որտեղ այսօր ինչ-որ մեկին չճանապարհեն դպրոց կամ բուհ»,- ասաց նախարարը՝ հավելելով, որ մեկնարկում են նոր ծրագրեր, որոնք գուցե միանգամից բոլոր խնդիրները չեն լուծում, բայց ակնհայտ է, որ մենք ունենք առաջընթաց, հաջողություններ, լավ երեխաներ, փայլուն մանկավարժներ:
«Ղարաբաղյան շարժման մեկնարկին ծնողներս որոշեցին, որ իրենց երեխան պետք է գնա հայկական դպրոց: Մինչ այդ սովորում էի հարևան ռուսական դպրոցում: Ինձ համար անչափ դժվար էր հայերեն լեզվով սովորել ֆիզիկա, երկրաչափություն, աստղագիտություն, քիմիա: Երկու ամիս տանջվել եմ, բայց հետո ստացվեց»,- անկեղծացավ նախարարը: