Երբ սահմանադրական փոփոխությունների նախագծի առաջին 7 գլուխները հրապարակվեցին, պաշտպանության նախարար Սեյրան Օհանյանն իր մտահոգությունը հայտնեց բանակի կառավարմանը վերաբերող դրույթների վերաբերյալ՝ ակնարկելով, որ հստակ հիերարխիայի բացակայություն կա:
«Մենք այն տեսակետին ենք, որ զինվորական հիերարխիան պետք է հստակ լինի, և այդ հստակության մեջ է զինվորականության միանձնյա ղեկավարման սկզբունքի հիմնական առկայությունը և նաև հաջողությունների գրավականը»,-ասել էր Սեյրան Օհանյանը մեզ հետ զրույցում։
Այսօր Պաշտպանության նախարարից կրկին հետաքրքրվեցինք՝ գո՞հ է նախագծի վերջնական տեսքից, հիերարխիայի հարցը լուծվե՞լ է։
«Քննարկումներին մենք մշտապես մասնակցել ենք, տվել ենք մեր առաջարկությունները, որոնք անցել են։ Այսօր անվտանգության և պաշտպանության խնդիրները նոր Սահմանադրության մեջ երաշխավորված են»,-պատասխանեց Սեյրան Օհանյանը։
Նշենք, որ փոփոխությունը, ըստ էության, վերաբերում է պաշտպանության նախարարի՝ որպես Զինված ուժերում թիվ մեկ անձի դերի հստակեցմանը:
Հուլիսին ներկայացված Սահմանադրության նախագծում ասվում էր. «Զինված ուժերի զինվորական ամենաբարձր պաշտոնատար անձը գլխավոր շտաբի պետն է, որը վարչապետի առաջարկությամբ նշանակվում է հանրապետության նախագահի կողմից»: Այս դրույթից երևում է, որ պաշպանության նախարարը որևէ ազդեցություն չունի գլխավոր շտաբի ղեկավարի վրա, ով չի հանդիսանում նրա անմիջական ենթական: Իսկ ահա օգոստոսի 21-ին ներկայացված Սահմանադրության նախագծի տարբերակում հիշյալ նախադասությանը ավելանում է ևս մեկ պարբերություն. «Ոչ պատերազմական ժամանակ գլխավոր շտաբի պետը ենթակա է պաշտպանության նախարարին»։
Պատերազմական ժամանակ վարչապետն է դառնում գերագույն գլխավոր հրամանատարը, և շտաբի պետը դառնում է վարչապետի անմիջական ենթական, ինչպես և պաշտպանության նախարարը:
