Լեռնային Ղարաբաղի նախկին արտգործնախարար Արման Մելիքյանից «Առաջին լրատվականը» հետաքրքրվեց, թե ինչպես է գնահատում Ադրբեջանի Միլի մեջլիսի ընտրությունները: Արման Մելիքյանը նշեց, որ Ադրբեջանի ընտրությունները պետք է անցնեին այնպես, ինչպես անցան: Նա ուշադրություն հրավիրեց այն հանգամանքի վրա, որ արմատական ընդդիմությունը ներկայացված չէ խորհրդարանում: Փոխարենը ներկայացված են իշխանության շահերը սպասարկող վերլուծաբաններ, որոնք միջազգային ատյաններում կաջակցեն Ադրբեջանի իշխանություններին: Անդրադառնալով իշխանությունը ներկայացնող գործիչների եւ քաղաքագետների պնդումներին, թե Հայաստանում եւ Լեռնային Ղարաբաղում ավելի ազատ ընտրություններ են անցկացվում, քան Ադրբեջանում, Արման Մելիքյանը նշեց, որ այդ համեմատությունն իրեն չի հետաքրքրում: «Դա պարզապես տհասության դրսեւորում է: Մենք պարզապես փորձում ենք առաջին տեղը զբաղեցնել մի շարքում, որը ոչ ժողովրդավարական է:Կեղծիքը կեղծիք է»,- ասաց Արման Մելիքյանը: ԼՂ նախկին արտգործնախարարը կարեւոր է համարում, որ մեր երկրում անցկացվեն իսկապես ազատ եւ արդար ընտրություններ, որոնք կբավարարեն հասարակության սպասելիքները: «Մենք, ըստ էության, տարբեր պետություններ ենք»,- ասաց նա: Արման Մելիքյանը կարծում է, որ Ադրբեջանում անցկացված ընտրությունները համապատասխանում են այդ երկրի ժողովրդի մեծամասնության աշխարհայացքին եւ սպասելիքներին : Մինչդեռ, ըստ մեր զրուցակցի, մեր երկրում անցկացվող ընտրությունները չեն համապատասխանում մեր ժողովրդի սպասելիքներին, այդ իսկ պատճառով էլ հասարակությունը բեւեռացվեց եւ բաժան-բաժան եղավ: Արման Մելիքյանի կարծիքով, մեր հասարակությունը չի կարողանում ձեւավորել պատշաճ այլընտրանք:
Հիշեցնենք, որ Ադրբեջանի կենտրոնական ընտրական հանձնաժողովի հրապարակած տվյալների համաձայն` 125 տեղանոց ադրբեջանական խորհրդարանում երկրի նախագահ Իլհամ Ալիեւի գլխավորած «Ենի Ազերբայջան» կուսակցությունը 72 պատգամավոր կունենա, իսկ արմատական ընդդիմությունը ներկայացնող երկու կուսակցությունների`Ժողովրդական ճակատի եւ «Մուսավաթի» նախընտրական դաշինքը հաջորդ գումարման խորհրդարանում ոչ մի պատգամավոր չի ունենա:
