Երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը «Հայկական Ժամանակին» հաստատել է, որ առաջիկայում Քոչարյանը հանդես կգա Սահմանադրության փոփոխությունների մասին հարցազրույցով, որոնց Քոչարյանը դեմ է: Նա իր նախկին հարցազրույցներից մեկում արդեն հայտնել է, որ դեմ է փոփոխություններին, և նոր հարցազրույցում արդեն Ռոբերտ Քոչարյանը ըստ էության հանդես կգա ավելի մանրամասն և թիրախավորված:
Ըստ էության, դա փաստորեն կլինի Ռոբերտ Քոչարյանի առաջարկը իշխանական համակարգին, այսինքն՝ համակարգի այն մասին, որ նա շարունակում է տեսնել իբրև իր քաղաքական պլանների հենարան: Թե ինչպիսին են այդ պլանները՝ մինչև այսօր այդպես էլ ոչ ոք չիմացավ, Ռոբերտ Քոչարյանը դրանք տարիներ շարունակ պահեց բոլորից գաղտնի, համենայնդեպս՝ չհրապարակեց որևէ մանրամասն: Կմանրամասնի՞ արդյոք նա իր պլանները նոր հարցազրույցում, թե՞ ոչ, այսինքն՝ առաջարկները կլինեն ուղղակի՞, թե՞ կրկին մեծավ մասամբ Ռոբերտ Քոչարյանի մեսիջները համակարգին կամ առնվազն պոտենցիալ յուրայիններին կկրեն անուղղակի բնույթ:
Խնդիրն այն է, որ ուղղակի առաջարկների դեպքում Ռոբերտ Քոչարյանը ստանձնում է դրանց պատասխանատվությունը, և այդ պարագայում արդեն, եթե իշխանական համակարգից բավարար միացողներ չլինեն, Քոչարյանի իշխանական գործոնի համար դա կլինի վերջին ակորդը: Իսկ երբ առաջարկները, մեսիջները անուղղակի են, ապա պատասխանատվությունն էլ անուղղակի է և հարաբերական, ու առնվազն մշտապես պահպանվում է քաղաքական խաղարկումների հնարավորությունը:
Ռոբերտ Քոչարյանը հետնախագահական շրջանում առաջնորդվել է հենց այդ մարտավարությամբ, ինչը, իհարկե, նրան իշխանությանը չի մոտեցրել, սակայն չի էլ հեռացրել ընդհանրապես ներիշխանական զարգացումներից և օգնել է մնալ, այսպես ասած, կայուն-ինտրիգային հեռավորության վրա:
Ընդհանուր առմամբ Ռոբերտ Քոչարյանի դիրքորոշման ենթատեքստը երևի թե պարզ է բոլորին. նա ակնկալում էր լինել 2018 թվականին Սերժ Սարգսյանից հետո նախագահական ամենահավանական թեկնածուն, և սահմանադրական փոփոխությունները նրա այդ ակնկալիքները կոտրում են:
Եվ ուրեմն Ռոբերտ Քոչարյանի համար սա դառնում է վերջին շանս, և առավել ևս, եթե նա կարողանա տապալել այդ փոփոխությունները, ապա նրա նախագահական շանսերը ավելի կմեծանան, քան եթե փոփոխությունների փորձ չլինեն ընդհանրապես:
Սակայն այստեղ հարց է առաջանում, թե նա ինչ շանսեր ունի փոփոխությունները տապալելու ուղղությամբ: Ակնհայտ է, որ շանսը մեկն է՝ եթե կարողանա կազմակերպել ներիշխանական ճակատ, որն ուղղակի ներքին սաբոտաժի կենթարկի փոփոխությունները: Եվ այս տեսանկյունից, ակնհայտ է, որ այն խոսակցությունները, թե Քոչարյանը կբացի կուսակցություն Վարդան Օսկանյանի միջոցով, ընդամենը վերաբերում են նրա բուն գործունեության առերևույթ կողմին: Իրականում Ռոբերտ Քոչարյանը կարող է հաջողության հասնել միայն իշխանական համակարգի ներսում աշխատանքի արդյունքում, եթե կարողանա իր կողմը գրավել հնարավորինս շատ ռեսուրսներ: Հենց այստեղ է գլխավոր խնդիրը, և Ռոբերտ Քոչարյանի հարցազրույցը ուղղված կլինի այս խնդրի սպասարկմանը:
Առայժմ նրա հարցազրույցները, որոնցում մշտապես առանցքայինը եղել է հենց այդ թիրախը կամ հասցեն, չեն առանձնացել էական արդյունավետությամբ, թեև չի բացառվում, որ Քոչարյանն ամենակարևոր ասելիքը պահել է ամենավճռական պահի համար: Անկասկած է, որ սահմանադրական փոփոխությունները նրա համար հենց այդ պահն են:
Լուսանկարը՝ PanARMENIAN Photo-ի