Օգոստոսի 21-ին վճռաբեկ դատարանը մերժել է վարույթ ընդունել դերասան Վարդան Պետրոսյանի մասնակցությամբ տեղի ունեցած ավտովթարի գործով Հակոբյանների փաստաբան Ռուբեն Բալոյանի բողոքը: Այս մասին «Առաջին լրատվական»-ի հետ զրույցում ասաց Վարդան Պետրոսյանի շահերի պաշտպան Նիկոլայ Բաղդասարյանը՝ հավելելով, որ դրանով իսկ իրենք քրեաիրավական առումով սպառել են Հայաստանի բոլոր հնարավոր դատական ատյանները։
Սա, փաստաբանի խոսքով, նշանակում է, որ դատավճիռը մտել է ուժի մեջ, և պետք է որոշվի՝ պատիժը ի՞նչ ռեժիմով պետք է կրի: Ըստ նրա՝ սա բաց տիպ է նախատեսում, այսինքն՝ Վարդան Պետրոսյանն իր պատիժը կկրի ազատ ռեժիմով։ Սա ենթադրում է, որ Վարդան Պետրոսյանը պատիժը կկրի ՀՀ տարածքում և չի ունենա մեքենա վարելու իրավունք։
Հետաքրքրվեցինք՝ ինչպե՞ս է Վարդան Պետրոսյանի առողջական վիճակը:
«Դեռևս բարվոք չէ, բայց եթե անցնի բաց ռեժիմի, ինձ թվում է՝ կփորձի նաև առողջական հարցերը վերականգնել»,- ասաց նա։
Հակոբյանների փաստաբանը նշել էր, որ կդիմի Եվրոպական դատարան։ Նիկոլայ Բաղդասարյանի խոսքով՝ սա որևէ դերակատարում չխաղացող գործընթաց է. «Եվրոպական դատարան դիմում են ոչ թե Վարդան Պետրոսյանի դեմ, այլ պետության դեմ, այսինքն՝ Բալոյանը դիմելու է ընդդեմ պետության»,- հավելեց փաստաբանը։
Ինչու առ այսօր Վարդան Պետրոսյանն ազատության մեջ չէ, երբ փաստաբանը դեռ ամիսներ առաջ էր հայտարարել, որ ազատության մեջ կլինի հունվարից հետո։
«Չեմ կարող ասել՝ պատճառն ինչն է, որ առ այսօր ազատության մեջ չէ։ Դատարաններն արհեստականորեն ձգձգեցին այս ժամկետը, կարող էր այս գործընթացն ամիսներ առաջ վերջացած լիներ, և Վարդան Պետրոսյանի վերաբերյալ որոշումը ամիսներ առաջ ուժի մեջ մտած լիներ»,- ասաց Նիկոլայ Բաղդասարյանը։
Փաստաբանը վստահ է, որ եթե Վարդան Պետրոսյանը հանրային դեմք չլիներ, այս գործընթացը վաղուց վերջացած կլիներ, և նա վաղուց ազատության մեջ կլիներ։
Հակոբյանների փաստաբան Ռուբեն Բալոյանն «Առաջին լրատվական»-ի զրույցում նշեց, որ Եվրոպական դատարան դիմելու գործընթացը դեռ քննարկման փուլում է. «Դեռ քննարկման փուլում է՝ կդիմենք թե ոչ։ Մենք հիմա հայցով դատարան ենք մտնելու, և հիմա ամեն ինչ կախված է նրանից, թե այդ վեճն ինչպես կլուծվի։ Մենք Վարդան Պետրոսյանի դեմ հայց ենք ներկայացնելու, և Եվրոպական դատարան կդիմենք թե ոչ, ամեն ինչ կախված է այդ հայցի հանգուցալուծումից։ Եթե հայցն ընդունվի ամբողջությամբ, բնականաբար, մենք հետ կկանգնենք այդ մտքից»,- ասաց Ռուբեն Բալոյանը՝ հավելելով, որ իրեքն ամեն ինչ կոռեկտության սահմաններում են անում։
«Մենք Վարդան Պետրոսյանից ինչ-որ ավելորդ գումարներ չենք ուզում, մենք Վերաքննիչ դատարանում պահանջած գումարից էլ հրաժարվեցինք։ Քանի որ ինքը հայտարարեց, որ տուժողի բուժման հետ կապված բոլոր ծախսերը ինքը կհոգա, մենք էլ ասացինք՝ եթե ինքը կհոգա, ուրեմն մենք այդ հայցից հրաժարվում ենք, բայց վերջին պահին հրաժարվեց խոստումը կատարելուց։ Դրա համար գործը այդ հարթություն տեղափոխենցինք։ Եթե խնդիրը կլուծվի փոխադարձ պայմանավորվածության, բարիդրացիական մթնոլորտում, բնականաբար, այլ հետևանքներ չի ունենա, շարունակություն չի ունենա։
Նա նաև նշեց, որ դեռ վաղաժամ է պահանջները հրապարակել։
Լուսանկարը` PAN Photo-ի
