Ամերիկյան Wall Street Journal-ում հրապարակվել է թուրք իսլամական գիտնական Ֆեթհուլլահ Գյուլենի հոդվածը, որում նա ողջ մուսուլմանական աշխարհին կոչ է անում դատապարտել ահաբեկչությունը և իրենց համայնքներում պաշտպանել մարդու իրավունքները, ինչպես նաև աջակցել կրթությանը։
Գյուլենի կարծիքով՝ այդ բոլոր գործողությունները հակաթույն կլինեն մուսուլմանների շարունակական խնդիրների համար։ Գյուլենը մուսուլմաններին նաև կոչ է արել հանդես գալ «տոտալիտար գաղափարախոսության» դեմ, որը տարածում է գտնում Մերձավոր Արևելքում ԴԱԻՇ-ի արյունալի գործողությունների ժամանակ։
Գյուլենն ընդգծել է՝ այն փաստը, որ ահաբեկիչներն իրենց չարագործությունները կատարում են իսլամի անունից, խորապես վնասում է բոլոր մուսուլմաններին, ինչի համար էլ բոլոր հավատացյալները պետք է միավորեն իրենց ջանքերն այդ «քաղցկեղի» դեմ պայքարում. «Հավատացյալները պետք է անեն ամեն հնարավոր բան, որպեսզի քաղցկեղի մետաստազներին հնարավորություն չտան տարածվելու մեր համայնքներում։ Եթե մենք դա չանենք, ապա մեզ վրա կծանրանա պատասխանատվության բեռը»։
Գյուլենը մուսուլմաններին կոչ է արել դատապարտել բռնությունը, քանի որ իսլամը մերժում է կրոնական յուրաքանչյուր հիմնավորում, որոնք ահաբեկիչներն առաջ են քաշում իրենց գործողությունների համար։
