ԱՄՆ-ն ու Ուկրաինան այսօր Օդեսայի և Նիկոլաևի մարզերում սկսում են Sea Breeze ծովային զորավարժությունները։ Բազմազգ զորավարժությունները, որոնց կմասնակցեն 2500 զինծառայողներ ԱՄՆ-ից, Ուկրաինայից և ԵՄ մի շարք երկրներից, կտևեն մինչև սեպտեմբերի 12-ը։
«Դա կարևոր հնարավորություն կլինի մեր գործընկերների հետ համագործակցության և ցամաքում, օդում ու ծովում լուրջ նախապատրաստության անցկացման համար»,- RIA Novosti-ն մեջբերում է ԱՄՆ ռազմածովային ուժերի 6-րդ նավատորմի հրամանատար, փոխծովակալ Ջեյմս Ֆոգոյի խոսքերը։
Նա նաև վստահություն է հայտնել առ այն, որ միջոցառումը ծովայիններին, զինվորներին, օդաչուներին և ծովահետևակայիններին թույլ կտա փոխանակվել արժեքավոր տեղեկատվությամբ և ամրապնդել կապերն ու միասնությունը տարածաշրջանում։