Իտալիայում մաֆիոզ կլանի պարագլուխ Վիտորիո Կազամոնիկայի պերճաշուք հուղարկավորությունն անցել է արքայավարի. «Կնքահայրը» ֆիլմի երաժշտություն, 6 ձիերով ոսկեզօծ կառք, ուղղաթիռից նետված վարդի թերթեր, հարյուրավոր սգացողներ: Այս մասին հայտնում է russian.rt.com-ը:
Արարողության հաջորդ օրը լրագրող Ալեսիո Վիսկարդին ուղևորվել է ուսումնասիրելու հրապարակը, որտեղից մեկնարկել է վարդերով լի ուղղաթիռը: Եվ նա լսել է իրեն կյանքից զրկելու սպառնալիքներ:
«Ես ուսումնասիրեցի վայրէջքային հրապարակը, որտեղից բարձրացել է ուղղաթիռը, որը նախօրեին թռչել է թաղման արարողության տարածքի վրայով: Ես պարզեցի, որ այն գտնվում է Տերցինյո քաղաքում՝ Նեապոլից ոչ հեռու: Կարճ ժամանակ անց, երբ ես սկսեցի նկարահանել, մոտեցավ ինչ-որ ավտոմեքենա, և ինձ շրջապատեցին 4 մարդիկ: Ինձ ասացին. «Մենք քեզ կսպանենք, վերջ տուր նկարահանմանը»: Նրանք ցանկանում էին, որ ես ջնջեի նկարահանածս տեսաֆայլը, բայց ես նրանց խաբեցի և ուրիշը ջնջեցի: Հետո իմ փաստաթղթերը վերցրին՝ հասցես իմանալու համար: Իսկ հետո ինձ բաց թողեցին»,- պատմում է լրագրողը:
Նեապոլի քաղաքապետն աջակցել է Վիսկարդիին՝ հայտարարելով, որ լրագրողներին ուղղված սպառնալիքն անթույլատրելի է: Լրագրողի խոսքով՝ թեև իրավապահ մարմինները շատ հանցավոր խմբավորումների պատասխանատվության են ենթարկել, ձևավորված վակուումը նոր մաֆիոզ ընտանիքներ են լրացրել:
«Ոստիկանությունը խափանել է որոշ հանցավոր կլանների գործունեութունը Հռոմում: Իսկ այժմ Կազամոնիկա ընտանիքը ցանկանում է այդ քաղաքում ավելի մեծ իշխանություն ստանալ: Հուղարկավորությունը մարմնավորել է մաֆիայի հզորությունը: Այն կազմակերպել են՝ բոլորին ցույց տալու համար, թե որքան ուժեղ է այդ ընտանիքը»,- նշել է Վիսկարդին:
