Լրտեսական վեպերի բրիտանացի ամենահայտնի հեղինակներից մեկը՝ Ֆրեդերիկ Ֆորսայթը, խոստովանել է, որ ավելի քան 20 տարի եղել է բրիտանական MI6 արտաքին հետախուզության ծառայության գործակալ: Այս մասին «Շնագայլի օրը» (1971) և «Պատերազմի շները» (1974) գործերի հեղինակը հայտնել է իր The Outsider: My Life ինքնակենսագրական գրքում՝ տեղեկացնում է BBC-ն:
77-ամյա գրողի խոսքով՝ իրեն հավաքագրել է MI6-ի սպաներից մեկը Նիգերիայում Բիաֆրա չճանաչված պետության անկախության համար 1967-1970թթ. պատերազմի ժամանակ ռազմական գործողությունները լուսաբանելիս: «Այդ պատերազմի վերջին տարին ես իմ նոր ընկերոջ համար ուղարկում էի ինչպես ԶԼՄ-ների լրագրողական ռեպորտաժներ, այնպես էլ այլ նյութեր »,- ասել է Ֆորսայթը BBC-ին տված հարցազրույցում:
«Բիաֆրայի պատմությունը» (1969) Ֆորսայթի առաջին գիրքն է, բայց ընթերցողներից ոչ ոք չէր կարծում, որ պատմության հիմքում հետախուզական կառույցներում աշխատելու հեղինակի անձնական փորձն է:
Հայտնի է, որ Ֆորսայթը որպես Reuters գործակալության թղթակից աշխատել է Բեռլինում, Փարիզում և Պրահայում: Եվ միայն այժմ է հայտնի դարձել, որ դա եղել է քողարկված աշխատանք: Միաժամանակ գրողը վստահեցնում է, որ իրեն երբեք ոչինչ չեն վճարել բրիտանական հետախուզությունում իր աշխատանքի համար: