Ռուսական TASS լրատվական գործակալության փոխանցմամբ` Հնդկաստանի քաղաքային զարգացման նախարարության ներկայացուցիչը հայտնել է, որ Հնդկաստանի կառավարությունը ծրագրում է երկրի 305 քաղաքում աղքատությունը նվազեցնելու համար գործարկել «Բնակարան բոլորի համար» ծրագիրը:
Այն պետք է կյանքի կոչվի 6 տարվա ընթացքում և իրականացվելու է 9 նահանգում: Ծրագրի ավարտը նախատեսված է 2022 թվականին, երբ երկրում կնշեն Հնդկաստանի անկախության 75-ամյակը: Այդ ընթացքում կկառուցվի 20 միլիոն բնակարան:
Պլանավորված է, որ նախագիծը կարժենա 2 տրիլիոն ռուփի (ավելի քան 30 միլիարդ դոլար):
Ներկայումս մոտ 170 միլիոն հնդիկ ապրում է մեգապոլիսների ծայրամասերի հետնախորշերում և ընդհանրապես հնարավորություն չունի բնակարան ունենալու: Հնդկաստանի վարչապետ Նարենդրա Մոդին հայտարարել է, որ այդ հավակնոտ ծրագիրը ժամանակակից Հնդկաստանի ամենագլխավոր առաջադրանքն է: