Արմավիրի մարզի ընդհանուր իրավասության դատարանում Վահե Խալաթյանի նախագահությամբ ընթանում է Հովսեփ Ս.-ի գործի դատական քննությունը:
42-ամյա Հովսեփը մեղադրվում է անչափահաս երեխային առևանգելու, երեխայի պապիկի նկատմամբ սպանության փորձ կատարելու և ամիսներ անց նրան դիտավորյալ սպանելու համար՝ ՀՀ քրեական օրենսգրքի 131 հոդվածի 2-րդ մասի 4-րդ կետով, 34-104 հոդվածի 1-ին մասով և 104 հոդվածի 1-ին մասով:
Հովսեփը «մտավոր թերնորմալություն» ունի:
Ըստ մեղադրանքի՝ 2013 թվականի հոկտեմբերին Հովսեփը, իբր, երազում տեսել է, որ իրենց հարևանի թոռնուհին՝ 2007 թվականին ծնված վեցամյա երեխան քարով խփել է իրենց շանը:
Երեխային «դաստիարակելու» նպատակով Հովսեփը ժամը 17-ի սահմաններում երեխայի կամքին հակառակ, նրա նկատմամբ բռնություն գործադրելով՝ ձեռքից քաշելով, նրան մանկապարտեզի խաղահրապարակից առևանգել է, տարել է մանկապարտեզին հարակից հիվանդանոցի նկուղ և 5-10 րոպե պահել է նկուղում:
Հովսեփի կողմից երեխային անհանգստացնելու վերաբերյալ երեխայի հայրը դիմում է գրել ոստիկանություն, այդ դիմումի հիման վրա նյութեր են նախապատրաստվել, քննարկվել է Հովսեփին հոգեբուժական հիվանդանոց՝ հետազոտման ուղարկելու հարցը:
Դրա մասին իմանալով՝ Հովսեփը զայրացել է, ցանկացել է վրեժխնդիր լինել:
2014 թվականի սեպտեմբերին, գործով չպարզված օրը Հովսեփը երեխայի պապիկին պատկանող խաղողի այգում մոտեցել է պապիկին, իր մոտ եղած ռետինե խողովակը փաթաթել է նրա պարանոցին ու սեղմել է՝ ցանկանալով խեղդամահ անել: Մոտակայքում գտնվող հարևանը լսել է աղմուկը, գոռգոռոցը, մոտեցել ու թույլ չի տվել, որ Հովսեփն իր հանցավոր մտադրությունը մինչև վերջ հասցնի:
Հովսեփը, ըստ մեղադրանքի, չի հանգստացել, վրեժ լուծելու ցանկությունը պահպանել է մի քանի ամիս:
2015 թվականի ապրիլի 28-ին, ժամը 11-ի սահմաններում նա երեխայի պապիկի՝ Էդվարդ Մ.-ի հետ նախապես պայմանավորվել է, որ հանդիպեն դաշտում, ինքը հյուրասիրի, ու հաշտվեն:
Տուժողը ոչինչ չի կասկածել, Հովսեփին հանդիպել է խաղողի այգու մոտ՝ սալորենու մոտ:
Հովսեփն իրոք հյուրասիրել է նրան իր հետ բերած ուտելիքով, միասին օղի են խմել: Տուժողին հասցնելով ալկոհոլային հարբածության վիճակի, դրանով նրան զրկելով դիմադրելու հնարավորությունից՝ Հովսեփը սեղմել է նրա պարանոցը՝ վահանաճառի շրջանում, և մեխանիկական շնչահեղձության եղանակով սպանել է:
Հովսեփ Ս.-ի խափանման միջոցը կալանավորումն է: