Սեպտեմբերի 1-ից նախագահականի հարևանությամբ գտնվող Սիրահարների այգում «Ոչ թալանին» նախաձեռնությունը ընդվզումների ալիք է սկսելու` էլեկտրաէներգիայի սակագնի բարձրացման օրակարգով: Սրան զուգահեռ՝ հասունանում է նաև սահմանադրական փոփոխությունների դեմ պայքարը, որին լծված է նաև նշված նախաձեռնությունը: Արդյոք հին օրակարգին անդրադառնալով` փորձո՞ւմ են պայքարի օջախներ բորբոքել և հանրությանը համախմբել ընդդեմ սահմանադրական փոփոխությունների նախագծի, ինչպե՞ս կանդրադառնա սակագնի դեմ պայքարը «ոչ»-ի պայքարի վրա՝ կնպաստի՞ ուժեղացմանը, թե՞ ոչ,: Թեմայի շուրջ «Առաջին լրատվական»-ը զրուցել է «Ոչ թալանին» նախաձեռնության անդամ Մաքսիմ Սարգսյանի հետ:
«Մենք հայտարարել էինք, որ հոսանքի թանկացման խնդիրը պետք է ոսկոր դարձնենք իրենց կոկորդում, որպեսզի չֆիքսվեն միայն սահմանադրականի վրա, հասկանան, որ մարդիկ սահմանադրականին զուգահեռ աչքաթող չեն անում նաև հոսանքի խնդիրը: Պայքարի տարբեր օջախներ պիտի ստեղծվեն: Աչքաթող չանելով սոցիալական խնդիրը` զուգահեռ պիտի պայքարենք` ուժեղացնելով միմյանց»,- ասում է Մաքսիմ Սարգսյանը:
Ակնհայտ է, որ սոցիալական խնդիրը կրկին թարմացնելով` նպատակ ունեն քաղաքացիներին փողոց դուրս բերել ու համախմբել նաև սահմանադրական փոփոխությունների դեմ: Սակայն հարց է ծագում` արդյոք դա կհաջողվի՞ հաշվի առնելով, որ բարձրացված սակագնի ժամանակավորապես սուբսիդավորումը պայքարի ելած քաղաքացիների զգալի մասը լուծում համարեց:
Մաքսիմ Սարգսյանն ասում է, որ դասեր են քաղել Բաղրամյան պողոտայից. փորձի պակասի պատճառով թույլ տված սխալներից այս անգամ հետևություն կանեն:
Ավելին` տեսանյութում:
