Կոտայքի մարզի ընդհանուր իրավասության դատարանում Հովհաննես Ավագյանի նախագահությամբ քննվում է 20-ամյա աղջկա գործ, ով մեղադրվում է հանցագործության մասին սուտ հաղորդում տալու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
Ըստ մեղադրանքի՝ աղջիկն իմացել է, որ ծնողները տանը հավաքած գումար ունեն՝ 5 միլիոն դրամ, ինչպես նաև դոլար:
Սկսած 2011թվականից, երբ դեռ 16 տարեկան էր, աղջիկն ընկերների հետ ծնողներից գաղտնի ծախսել է ծնողների գումարը ու զվարճացել է: Մասնավորապես՝ մինչև 2014 թվականը նա զվարճացել է մի տղամարդու հետ, իսկ հետո՝ մինչև 2015 թվականի հունիս ամիսը՝ մեկ ուրիշի հետ:
Երբ տանն այլևս ծախսելու գումար չի մնացել, զվարճասեր աղջիկը, վերջապես հիշելով, որ հորից վախենում է, հունիսի 20-ի երեկոյան, տանը մենակ լինելով, խառնել է տան իրերը, ցաքուցրիվ է արել, կապկպել է ինքն իրեն, օգնության է կանչել ազգականին, ապա զանգահարել է ոստիկանություն և հայտնել է, թե իրենց տան վրա ավազակային հարձակում է եղել:
Գործով իրեղեն ապացույցների շարքում են հոսանքի երկու երկարացման լարերը, մեկուսիչ ժապավենը…
Շատ չանցած՝ սուտը բացահայտվել է, երևակայական ավազակների փոխարեն աղջիկն է հայտնվել մեղադրյալի կարգավիճակում…
Նրա խափանման միջոցը ստորագրությունն է չհեռանալու մասին: