Շաբաթ օրը Լիբանանի մայրաքաղաքում ավարտվեցին հակակառավարական ցույցերը՝ տեղեկացնում է tass.ru-ն:
Ագրեսիվ տրամադրված երիտասարդների մի խումբ գիշերվան մոտ սկսել է հարձակումները երկրի Նախարարների խորհրդի նստավայրը շրջափակած փշալարերի վրա: Նրանց հաջողվել է հաղթահարել ցանկապատի առաջին գիծը և մոտենալ համալիրի տարածքին: Սակայն անվտանգության ուժերի հատուկ ջոկատայինները կանգնեցրել են նրանց, և հաշված րոպեների ընթացքում հրապարակը մաքրել են ցուցարարներից, իսկ անկարգություն հրահրողները ձերբակալվել են:
Հասարակական ակցիան, որին մասնակցում էին մոտ 50 հազար մարդ, սկսվել էր Պլյաս դե Մարթիր հրապարակից՝ թուրքերի կողմից մահապատժի ենթարկված ազատամարտիկների հուշարձանի մոտից: Սկզբում այն խաղաղ բնույթ էր կրում: Կազմակերպիչներից մեկի խոսքերով՝ մարդիկ եկել էին ազգային դրոշներով՝ որպես վկայություն, որ ոչ մի քաղաքական կուսակցություն չեն ներկայացնում:
Սակայն երեկոյան կողմ ցուցարարների շարքերում հայտնվեցին ծայրահեղականներ, որոնք վերջնագիր ներկայացրին «կաշառակեր ռեժիմին» և պահանջեցին 72 ժամվա ընթացքում հրաժարական տալ: