Թուրքական Anadolu լրատվական գործակալության փոխանցմամբ` «Քրդստանի աշխատավորական» կուսակցության (PKK) զինյալները ինտենսիվացրել են իրենց զինված ակցիաները, որոնք ուղղված են երկրի տնտեսության ու զարգացման դեմ:
PKK-ի զինյալները մասնավորապես 13 անգամ հարձակվել են ամբարտակների վրա, որոնց ժամանակ գործածության համար ոչ պիտանի են դարձրել 687 միավոր շինտեխնիկա, փոխադրամիջոցներ, որոնց թվում նաև շտապօգնության մեքենաներ:
PKK-ի զինյալների թիրախում են գտնվել նաև պետհիմնարկներ, հասարակական շենքեր, ոստիկանական ավտոմեքենաներ, ռազմական տեխնիկա, քաղաքային ավտոբուսներ, բեռնատարներ, քաղաքացիական ավտոմեքենաներ և այլն:
PKK-ի իրականացրած հարձակումներից 483 դեպքը բաժին է ընկել ոստիկանության պատասխանատվության գոտուն, իսկ 323-ը` Ժանդարմերիայի պատասխանատվության գոտուն:
Մասնագետների գնահատմամբ` այդ հարձակումների հետևանքով Թուրքիային պատճառվել է 100 միլիոն թուրքական լիրայի (1 դոլարը հավասար է մոտ 3 լիրայի) վնաս: Մասնագետներն ընդգծել են, որ եթե հաշվի առնեն նաև այն, որ PKK-ի հարձակումները հանգեցնում են ներդրումների ձգձգմանը, տարածաշրջանում լարվածության մակարդակի աճին ու արժույթի շուկաների վրա ազդելուն, ապա PKK-ի տվյալ գործողությունների պատճառած նյութական վնասը կստացվի շատ ավելի մեծ:
