Գյումրու «Գոհար» մանկապարտեզը գործում է դեռևս անցյալ դարի վաթսունականներին կառուցված, խորհրդային ժամանակների տիպային շենքում, որը վերջին անգամ կոսմետիկ մասնակի վերանորոգման է ենթարկվել է 4 տարի առաջ, իսկ թե երբ է կապիտալ վերանորոգման ենթարկվել՝ տնօրենը չհիշեց: Այսօր նախակրթարանն ունի 128 սան: Աշխատակիցները 28-ն են:
«Մանկապարտեզն առաջին հերթին ունի սանհանգույցի և խոհանոցային հատվածի վերանորոգման կարիք: Սա թիվ մեկ խնդիրն է մեր համար,- նշեց մանկապարտեզի տնօրեն Սյուզաննա Հարությունյանը «Առաջին լրատվական»-ի հետ զրույցում:- Եթե այս հարցը կառավարությունը կարողանա լուծել, մնացած խնդիրները մենք մի կերպ գլուխ կբերենք»:
Տիկին Հարությունյանը նշեց, որ քաղաքային իշխանությունների օժանդակությամբ և սեփական տնտեսումների հաշվին այս տարի մինչև ջեռուցման սեզոնի մեկնարկը կկարողանան լուծել մանկապարտեզի բավականին մեծ շենքի մի մասնաշենքի ջեռուցման հարցը. «800 հազար դրամ գումար քաղաքապետարանն էր տվել, մենք էլ տնտեսում ունեցանք ամառվա այս ամիսներին կոմունալների առումով, և այս տարի գոնե փոքրերի հատվածքում «Բաքսի» ջեռուցման համակարգը կլինի: Չնայած որ գաղտնիք չէ՝ այս մանկապարտեզը վերջին երկու տարում ակամա դարձավ պրոբլեմների թնջուկ»:
Խոսքը, անշուշտ, մանկապարտեզի շուրջ ստեղծված իրավիճակն էր` պայմանավորված նախկին տնօրենի հակաօրինական քայլերով: Ըստ պաշտոնական մեղադրանքի` քաղաքապետարանից փոխանցված, ինչպես նաև վարձավճարներից հավաքագրված ընդհանուր 1 միլիոն 760 հազար 270 դրամը տնօրենի կողմից աշխատավարձի, սնունդ մատակարարած ընկերությունների հանդեպ ունեցած պարտավորությունների և կոմունալ ծախսերի վճարների մարմանը չուղղելու և օգտագործելով պաշտոնեական դիրքը՝ յուրացման եղանակով հափշտակելու փաստով:
«Մինչև հիմա էլ դեռ դատական պրոցեսների մեջ ենք: Դե, գիտեք, երբ գործը նոր էր բացահայտվում, այսպես ասենք՝ բացահայտման առաջին ալիքի իներցիայի տակ բավականին լուրջ խախտումներ արձանագրվեցին: Արդյունքում մանկապարտեզը տուգանվեց 11 միլիոն դրամով: Հետո արդեն, երբ քննությունը շարունակվեց, պարզվեց, որ ճիշտ է, խախտումներ կան, ու դա ոչ ոք չի ժխտում, սակայն այն աստիճանի չէին, որ նման` մանկապարտեզի համար ահռելի գումարով տուգանք դրվեր մեզ վրա: Մի պահ եղավ, որ նույնիսկ խոսակցություն գնաց մանկապարտեզի շենքն ու գույքը աճուրդի դնելու մասին: Սակայն պայքարեցինք դատարանում և այսօր սպասում ենք վերաքննքիչի վճռին:
Մեր պայքարը, ի դեպ, անպտուղ չեղավ` կարողացանք 11 միլիոն տուգանքը իջեցնել մինչև մոտավորապես 300-500 դրամի: Ուրախ եմ, որ բարձր դատական ատյանները հաշվի առան մեր դիմումները, ներկայացված հավելյալ փաստերն ու ապացույցները: Սակայն էլի եմ կրկնում, այս ամենից առավել մեզ համար կարևոր է այն, որ կարողանանք կառավարության կամ անհատ ներդրողների միջոցով վերանորոգել մեր նախակրթարանի խոհանոցային հատվածն ու սանհանգույցները»,- ամփոփեց տիկին Հարությունյանը` հույս հայտնելով, որ «Առաջին լրատվական»-ի միջոցով կառավարությունն ականջալուր կլինի մանկապարտեզի 128 փոքրիկ սաների խնդրանքին:
