Ադրբեջանական Turan լրատվական գործակալության փոխանցմամբ` Fitch Ratings միջազգային վարկանիշային գործակալությունը հայտնել է, որ Ադրբեջանն ակտիվորեն ծախսելու է պետական ակտիվները:
Գործակալությունն ընդգծում է, որ Ադրբեջանի կայուն վարկանիշն արտացոլում է պետպարտքի ցածր մակարդակն ու օտար մաքուր ակտիվների մեծ պաշարը, 2006 թվականից նավթի բարձր գների ժամանակ կուտակած եկամուտները:
Միևնույն ժամանակ նավթից ու գազից Ադրբեջանի ունեցած մեծ կախվածությունը նրա թույլ կողմն է, քանի որ 2015 թվականի պետբյուջեում ածխաջրածիններին բաժին է ընկնում արտահանման 95 տոկոսը, բյուջետային եկամուտների 50 տոկոսը և ՀՆԱ-ի 40 տոկոսը:
Նավթի ցածր գների տևական ժամանակաշրջանը, ինչպես նաև ծախսերը կրճատելուց հրաժարվելը կհանգեցնեն պետական ակտիվների ակտիվ ծախսելուն:
Fitchը կանխատեսում է, որ 2015 թվականին Ադրբեջանում սպառողական գները կաճեն 5.5 տոկոսով: Մանաթի արժեզրկումը հանգեցրել է դոլարացման կտրուկ աճի:
