«Միշտ ասել եմ և հիմա էլ կրկնում եմ՝ ԲՀԿ-ն որևէ առնչություն չունի Քոչարյանի հետ։ Դա ասել եմ նաև ԲՀԿ-ի ակտիվ շրջանում։ Երբ այն ժամանակ աջակցում էինք այդ շարժմանը, ես հայտարարում էի, որ մենք աջակցում ենք ոչ թե ԲՀԿ-ին որպես կուսակցություն, այլ կոնկրետ Գագիկ Ծառուկյանին, որովհետև ինձ համար անհասկանալի է ԲՀԿ-ն առանց Ծառուկյանի, և հիմա շատ անհասկանալի է դիրքորոշման փոփոխությունը, որովհետև շատ դեպքերում եմ լսել նույն մարդկանց ելույթները, և ինձ համար մի քիչ տարօրինակ է, որ մարդիկ ինչ-որ իրավիճակի փոփոխությունից կոնկրետ երևույթների, փաստաթղթերի և տարբեր դեպքերի մասին փոխում են իրենց պատկերացումները հարյուր տոկոսով»,-«Առաջին լրատվական»-ի հետ զրույցում ասաց «Ազգային անվտանգություն» կուսակցության նախագահ, քաղաքագետ Գառնիկ Իսագուլյանը՝ անդրադառնալով Սահմանադրական փոփոխությունների հայեցակարգի շուրջ ԲՀԿ-ի դիրքորոշման փոփոխությանը։
Նրա խոսքով՝ շատ լավ կլիներ, որ Սահմանադրական փոփոխությունների քննարկումներին բոլորը մասնակցեն, քանի որ, միևնույն է, գործընթացը սկսված է և շատ կարևոր է, որ առաջին և երկրորդ նախագահներն ակտիվ մասնակցություն ունենան, հստակ արտահայտեն դիրքորոշում և դրանից հետո գործունեություն ծավալեն։
Ըստ նրա՝ լավ կլինի, որ նրանից մեկը նախաձեռնի և անպայման կայանա այդ հանդիպումը, ինչը կարևոր է կոնսոլիդացիայի համար։