«Երևան քաղաքի բոլոր հանրակրթական դպրոցները պատրաստ են ընդունելու և՛ պաշտոնյաների, և՛ բանվորների երեխաներին»,- այսօր ուսուցիչների ամենամյա խորհրդակցությունից հետո լրագրողների հետ զրույցում ասաց փոխքաղաքապետ Արամ Սուքիասյանը՝ պատասխանելով «Առաջին լրատվական»-ի հարցին, թե պաշտոնյաների կողմից մասնավոր դպրոցներին նախապատվություն տալը արդյոք չի՞ նշանակում, որ նրանք թերագնահատում են հիմնական դպրոցները:
«Ես չգիտեմ, թե դուք ինչու եք անընդհատ պաշտոնյաների զավակների հանգամանքը ֆիքսում, քանի որ դրանք կարող են լինել պարզապես բիզնեսմենների երեխաներ: Համենայնդեպս, դա իրենց անձնական խնդիրն է, թե որ դպրոց են ցանկանում տանել իրենց երեխաներին: Ես անձամբ որևէ լուրջ տարբերություն չեն տեսնում, և շատ հաճախ մեր հանրակրթական դպրոցները շատ ավելի լավ կրթություն են ապահովում, քան հայտնի, բազմիցս գովազդված մասնավոր դպրոցները, որտեղ բավական բարձր վճար է»,- ասաց փոխքաղաքապետը՝ հավելելով, որ ինքը չի կարծում, որ այդ դպրոցների սահմանած վարձավճարը համարժեք է տրված կրթությանը:
Լրագրողներից մեկի դիտարկմանը ի պատասխան, թե քանի որ ԿԳՆ Արմեն Աշոտյանի զավակները հաճախում են մասնավոր «Այբ» դպրոց, դա չի՞ նշանակում, որ նախարարը թերագնահատում է հանրակրթական դպրոցը, փոխքաղաքապետը նկատեց. «Դժվարանում եմ պատասխանել, թեպետ ձեր ասածի մեջ կա տրամաբանություն»:
Արամ Սուքիասյանը խոսեց նաև ներառական կրթության ներդրումից, առկա խնդիրներից ու նոր ուսումնական տարվա մեկնարկից:
Առավել մանրամասն՝ տեսանյութում: