Երևանի 149 հիմնական դպրոցի տնօրեններ այսօր մասնակցում էին ուսուցիչների ամենամյա օգոստոսյան խորհրդակցությանը, որը վարում էին ԿԳ փոխնախարար Մանուկ Մկրտչյանը, քաղաքապետի տեղակալ Արամ Սուքիասյանը և հանրակրթության վարչության պետ Գայանե Սողոմոնյանը:
Վերջինս բավական մանրամասն ներկայացրեց նախորդ տարիներին իրենց ձեռքբերումները, լուծած խնդիրները և ուսուցիչներին հորդորեց լցվել եռանդով՝ դիմավորելու նոր ուսումնական տարին:
Ի տարբերություն Գայանե Սողոմոնյանի, որը հիմնականում խոսում էր ձեռբերումներից, քաղաքապետի տեղակալ Արամ Սուքիասյանը խոսեց առկա խնդիրներից: Նախ հանրակրթության վարչության պետին հանձնարարեց խորհրդակցություն անցկացնել իմիջային՝ Չոխովի, Պուշկինի, Չարենցի, Աղբալյանի անվան և նմանատիպ մի քանի այլ դպրոցների տնօրենների հետ և պարզել, թե ինչպես են նրանք օրվա ընթացքում 3 հերթով ուսուցում իրականացնում: Ես առաջարկում եմ այդ դպրոցների տնօրեններին կանչել խորհրդակցության և հասկանալ՝ արդյոք որակի վրա ազդո՞ւմ է այդ 3 հերթով ուսուցումը: Լավ դպրոցի համբավը, իմիջը ձևավորել ենք և դրանով պայմանավորված՝ մի շարք պաշտոնյաներ իրենց զավակներին շարունակում են ուղղորդել այդ դպրոց, և արդյունքում ստացվում է, որ բուհ ընդունվելն ավելի հեշտ է, քան այդ դպրոցներ: Ես կարծում եմ՝ չի կարող արդյանավետ լինել 3 հերթով ուսուցումը, և այդ խնդիրը պետք է լուծվի»,- ասաց փոխքաղաքապետը:
Սուքիասյանը, ըստ էության, նաև քննադատեց ԿԳՆ կրթության քաղաքականության մշակումը՝ շեշտը դնելով ներառական կրթության վրա: Ըստ փոխքաղաքապետի՝ վաղաժամ է բոլոր դպրոցներում այդ ծրագրի ներդրումը, քանի որ «առողջ երեխաների հոգեկան վիճակի վրա ազդում է խնդիրներով երեխաների հետ համատեղ ուսուցումը»:
Փոխքաղաքապետի այս հայտարարությունը դուր եկավ դահլիճում ներկա տնօրենների մեծ մասին, ովքեր ծափահարություններով ընդունեցին այն: Մինչդեռ Ջոն Կիրակոսյանի անվան հիմնական դպրոցի տնօրեն Անահիտ Խոսրովյանը առանձնացավ մյուսներից և ողջունեց ծրագրի համատարած ներդրումը:
Ըստ նրա՝ դա հրաշալի ծրագիր է, և, վերջիվերջո, ցանկացած ծնող և երեխա իրավունք ունի ընտրելու այն դպրոցը, որը ցանկանում է հաճախել: «Եվ հետո, եթե այդ դեմ արտահայտվողները գան դպրոց ու տեսնեն, թե ինչ հրաշալի են երեխաները վարվում միմյանց հետ, ինչպես են օգնում միմյանց, ֆիզկուլտուրայի ժամին ինչպես են օգնում խնդիրներ ունեցող իրենց ընկերներին փոխել կոշիկները ու մասնակցել խաղերին, ապա կապշեն: Այնպես որ ներառական կրթության ներդրումը հրաշալի ծրագիր է»,- ասաց տնօրենը:
Առավել մանրամասն՝ տեսանյութում:
