Հայաստանը 2100 թվականին կունենա 1,7-1,8 միլիոն բնակչություն: Այս մասին օգոստոսի 28-ին նշեց ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը` ներկայացնելով ՄԱԿ-ի 2015 թվականին հրապարակած զեկույց-կանխատեսման տվյալները:
«Վերջերս ՄԱԿ-ի ներկայացրած կանխատեսումները բավականին մեծ քննարկումներ առաջացրին: Կանխատեսումներն անհրաժեշտ են, որպեսզի մարդիկ պատկերացում կազմեն, թե ինչ է սպասվում: Կանխատեսումը կարող է փոխվել շատ հասարակ բանից, օրինակ` գլոբալ ճգնաժամից: Աշխարհում այսօր 7,3 միլիարդ բնակչություն կա, որը մինչև 2100 թվականը կաճի և կհասնի 11,2 միլիարդի: Հիմնական ու ամենամեծ աճը կապահովի Աֆրիկան: Ասիան իր դիրքերը կսկսի զիջել, չնայած այսօր մարդկանց թվով այն ամենամեծ տարածաշրջանն է, Եվրոպայում նույնպես բնակչությունը կպակասի: Մնացած աշխարհամասերում բնակ չության փոքր աճ է կանխատեսվում»,-«Արմենպրես»-ի փոխանցմամբ` նշել է Գարիկ Հայրապետյանը:
Խոսելով տարածաշրջանում կանխատեսվող բնակչության թվի մասին` ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչը նշեց, որ Ադրբեջանում բնակչության թիվը կկազմի 9,5 միլիոն` այսօրվա 9,7 միլիոնի փոխարեն:
«Իրանն ու Թուրքիան կմնան բնակչության թվով մեծ երկրների շարքում, չնայած այնտեղ էլ որոշակի նվազում կնկատվի: Այսօր Հայաստանում 3 միլիոնից մի փոքր ավելի մարդ կա: Վատատեսական կանխատեսումներով էլ 2100-ին մեկ միլիոնից քիչ բնակչություն կարող ենք ունենալ»,-տեղեկացրեց Գարիկ Հայրապետյանը:
Լուսանկարը՝ Armenpress-ի
