Թուրքական Taraf թերթի փոխանցմամբ՝ բրիտանական Financial Times թերթի՝ միջազգային հարաբերությունների հարցերով մեկնաբան Դևիդ Գարդներն իր հոդվածում անդրադարձել է Թուրքիայի քաղաքական վերջին զարգացումներին ու մոտեցող ընտրություններին։ Դրանում Գարդները նշել է, որ Էրդողանը ցանկանում է Թուրքիայում հաստատել «Մեկ մարդու» ռեժիմ, «Մեկ մարդու» կառավարում։
Մեկնաբանն ընդգծել է, որ Թուրքիան հայտնվել է մեկ մարդու՝ նախագահ Ռեջեփ Էրդողանի հավակնությունների գերության մեջ, և որ հունիսին անցկացված խորհրդարանական ընտրություններից հետո նա երկիրը մղել է դեպի նոր ընտրություններ՝ կապված այն բանի հետ, որ «Արդարություն և զարգացում» կուսակցությունը (ԱԶԿ) չի կարող ձևավորել միակուսակցական կառավարություն։
Գարդների խոսքով՝ Էրդողանը նման է Օսմանյան նոր պալատից (1000 սենյակից բաղկացած Աք սարայ նախագահական պալատ) երկիրը ղեկավարող սուլթանի, իսկ նրա պահվածքը հիշեցնում է Ֆրանսիայի թագավոր Լյուդովիկոս XV-ի հայտնի խոսքերը՝ Après moi, le deluge (ինձանից հետո թեկուզ ջրհեղեղ)։ Գարդները հավելել է, որ հենց Էրդողանն է այն բոլոր խնդիրների պատճառը, որոնց այսօր բախվում է Թուրքիան։