Ռուս զինծառայող Վալերի Պերմյակովի գործով կայացված վճիռը արդեն մի քանի օր է մտել է օրինական ուժի մեջ։
Հիշեցնենք, որ Ռուսաստանի Հյուսիսկովկասյան օկրուգի զինվորական դատարանի 5-րդ կայազորի դատարանը Գյումրիի 102-րդ ռազմաբազայի տարածքում անցկացվող արտագնա նիստում Պերմյակովին մեղավոր ճանաչեց զենքով դասալքություն կատարելու, հրաձգային զենք, զինամթերք հափշտակելու և ապօրինի կրելու մեջ և դատապարտեց ընդհանուր առմամբ 10 տարվա ազատազրկման՝ խիստ ռեժիմի ուղղիչ աշխատանքային գաղութում:
Ռուսաստանի դաշնության օրենսդրության համաձայն՝ կողմերը 10 օր ժամանակ ունեին վճիռը բողոքարկելու համար, սակայն վերաքննիչ դատարան բողոք չներկայացվեց, և դատավճիռը մտավ օրինական ուժի մեջ:
Սպասվում էր, որ վճռի օրինական ուժի մեջ մտնելուց հետո տեղի կունենա Վալերի Պերմյակովի ֆիզիկական արտահանձնումը հայկական կողմին, որպեսզի հայկական կողմը սկսի արդեն սպանության գործով դատաքննությունը: Ինչպես ավելի վաղ հայտնի էր դարձել Հայաստանի հանրապետության նախագահ Սերժ Սարգսյանի պաշտոնական կայքէջի հայտարարությունից՝ Ռուսաստանը Հայաստանին էր հանձնել այդ մասով Պերմյակովին դատելու իրավունքը:
Ավելի վաղ «Առաջին լրատվական»-ի հետ զրույցում Ռուսաստանի Փաստաբանների միության նախկին փոխնախագահ, հայտնի իրավաբան Ալեքսեյ Բինեցկին համոզմունք էր հայտնել, որ հենց դատավճիռը մտնի օրինական ուժի մեջ, Պերմյակովը պետք է ֆիզիկապես հանձնվի հայկական կողմին:
Ավետիսյանների տուժողների իրավահաջորդները մինչ այս պահը բացարձակապես տեղեկություն չունեն, թե այդ արտահանձնումը երբ է տեղի ունենալու և ինչ ընթացակարգով։ Արդյո՞ք Պերմյակովը կպահվի ռուսական մեկուսարանում, և հայ քննիչներն ընդամենը նրան հարցաքննելու իրավունք կունենան, թե վերջինս կտեղափոխվի Հայաստանի տարածքում գտնվող որևէ մեկուսարան և կկարողանա ներկա լինել դատաքննությանը:
«Առաջին լրատվական»-ի հետ զրույցում ռուս-հայկական «Արմռոս» իրավաբանների ասոցիացիայի անդամ, փաստաբան Իվան Գրիգորյանը ևս նշեց, որ եթե դատավճռի բողոքարկում չի եղել, ապա պետք է, որ օրինական ուժի մեջ մտնելուց հետո Վալերի Պերմյակովը հանձնվեր հայկական կողմին, որեպեսզի հայկական կողմն արդեն սպանության մասով դատաքննություն սկսի․«Հայաստանին գոնե պետք է հնարավորություն տրվի նրա հետ շփվելու, հարցաքննելու համար, գուցե ստեղծվի համատեղ խումբ: Ընդհանրապես Ռուսաստանն իր քաղաքացիներին չի փոխանցում, բայց այս դեպքում պետք է փոխադարձ աշխատանք տարվի և հասկանալի լինի, թե ինչպես է անցնելու արդեն սպանության մասով դատաքննությունը»:
Լուսանկարը` sputnikarmenia.ru-ի