News Georgia լրատվական գործակալության փոխանցմամբ՝ Վրաստանի նախագահ Գեորգի Մարգվելաշվիլին, երեկ մեկնաբանելով երկրում ՆԱՏՕ-ի համատեղ ուսումնական կենտրոնի բացումը, հայտարարել է, որ Վրաստանը դրանով իսկ ևս մեկ քայլ կատարեց դաշինքի հետ հարաբերությունների խորացման ուղղությամբ:
«Ես ողջունում եմ ՆԱՏՕ-ի գլխավոր քարտուղարի այցը Վրաստան։ Դա նոր և կարևոր քայլ է Վրաստանի ու ՆԱՏՕ-ի համագործակցության մեջ։ Ուելսի գագաթնաժողովի ժամանակ ընդունված էական միջոցների փաթեթը կոչված է խորացնելու մեր համագործակցությունը։ Այսօր մենք կարևոր քայլ կատարեցինք այդ ուղղությամբ։
Ուսումնական կենտրոնը կծառայի տարածաշրջանում կայունության, խաղաղության ու անվտանգության բարձրացմանը։ Չնայած նրան, որ Վրաստանի տարածքի 20 տոկոսն օկուպացված է, քաղաքացիների 10 տոկոսը սեփական երկրում դարձել են հարկադիր վերաբնակներ՝ այնուամենայնիվ, մենք ակտիվորեն աշխատում ենք ՆԱՏՕ-ի հետ։
Այսօր մենք հպարտորեն կանգնած ենք այստեղ՝ վրացական տարածքում, քանի որ ուժեղացնում ենք մեր պաշտպանունակությունը, ուժեղացնում ենք այն արժեքների պաշտպանությունը, որոնց համար պայքարել ենք ամբողջ ընթացքում։ Դրանք են մեր պաշտպանունակությունը, ազատ, անկախ ու ժողովրդավարական պետություն ունենալը։ Մեր նոր ուսումնական կենտրոնը էլ ավելի կկատարելագործի մեր զինծառայողների հմտությունները»,- ասել է Վրաստանի նախագահը։