Լուրեր
Սահմանադրական փոփոխությունները հետագայում օգնելու են մեզ ապրել
  • 22:00
  • 2015-08-26
  • Դիտումներ՝ *

«Առաջին լրատվական»ի Realpolitik հաղորդաշարի հյուրն է ԱԺ ՀՀԿ խմբակցության պատգամավոր Կարինե Աճեմյանը:

Տիկին Աճեմյան, նախօրեին Վենետիկի հանձնաժողովը հանդիպեց քաղաքական ուժերի հետ: Արդեն սկսվում է նախանշվել այն քաղաքական ուժերի պատկերը, որոնք որ, ըստ ամենայնի, կողմ կլինեն սահամանադրական փոփոխություններին, ոմանք էլ ռադիկալ ընդդիմության կամ «ոչ»-ի դիրքերից հանդես կգան: Գնալով պարզ է դառնում, թե ինչու են ձեր հակառակորդները կամ սահմանադրական փոփոխությունների ընդդիմախոսները որոշել դեմ հանդես գալ: Նրանց բացատրությունները, նրանց մեկնաբանությունները, դիրքորոշումը Ձեզ համար որքանո՞վ է ընկալելի և պարզ:

-Ոչ միայն կուսակցությունները, այլ նաև ՀԿ-ները, քաղաքացիական նախաձեռնության ներկայացուցիչներ էին մասնակցում այդ հանդիպմանը: Ես հիասթափված եմ այն առումով, որ մենք ճիշտ Վենետիկի հանձնաժողովի հետ աշխատել ենք և աշխատում ենք, և պարզ է, որ հարցադրումներ պետք է լինեին, բայց ամեն մարդ, ամեն գործիչ պետք է հասկանա՝ ուր է գնում և ում հետ է հանդիպում: Ի վերջո այդ հանձնաժողովը պրոֆեսիոնալ գործող հանձնաժողով է, խորհրդատվական, որևէ ճնշում, որևէ պարտադրանք որևէ երկրի սահմանադրության վրա չի եղել: Պարզապես իրենք բարձր որակի ծառայություն են մատուցում, որովհետև իրենք համադրում են սահմանադրությունը եվրոպական չափանիշներին, այն բոլոր միջազգային կոնվենցիաներին, որոնք մենք ընդունել ենք և իհարկե, կան մոտեցումներ այս պահին, որոնց հետ մենք ինքներս էլ համաձայն չենք, բայց որպեսզի փաստաթուղթը վերջնական տեսք ունենա, այնպիսին, որը մեզ հետագայում ոչ թե խանգարելու է ապրել, այլ օգնելու է, և այդ փաստաթուղթը պետք է լինի հանրության կողմից ընդունված, Վենետիկի հանձնաժողովի հետ փոխհամագործակցության աշխատանքային մթնոլորտում շատ հարցեր փաստորեն այս երկու տարիներին քննարկվել են, համաձայնեցվել: Գալ հանդիպմանը, բողոքել երկրից, բողոքել իշխանություններից, ես դա համարում եմ չափազանց դիլետանտ մոտեցում: Մենք վայրենի ազգ չենք, մեր օրենսդրությունը չափազանց մոտ է եվրոպական օրենսդրությանը, և ԱՊՀ երկրների այս տարածքում ՀՀ-ն առաջիններից է, որը շատ լավ օրենսդրություն ունի, այլ բան է, թե մենք ինչպես ենք կյանքի կոչում, բայց շատ ոլորտներում մեր օրենսդրությունը առաջ է:

Ձեր ընդդիմախոսները, նախօրեին պնդում էին, որ հասկացել են Սերժ Սարգսյանի իրական նպատակաները, և նրանք համոզված են, որ իրականում Սերժ Սարգսյանը ձգտում է դառնալ ԱԺ նախագահ, և իրենք ջանք չեն խնայելու պայքարելու Սերժ Սարգսյանի այդ նպատակի իրագործման դեմ: Ըստ էության, «ոչ»-ի շարժում է սկսվում տարբեր քաղաքական և քաղաքացիական ուժերի կողմից, հավանաբար «Ժառանգությունը», ՀԱԿ-ը կլինեն այդ դաշտում: Նրանց հիմնավորումները և այդ գնահատականները, այն հեռանկարների մասին, որ նրանք են ներկայացնում Սահմանադրական փոփոխությունների վերաբերյալ, որքանո՞վ է Ձեզ համար հասկանալի կամ ընդունելի:

-Ընդունելի չէ: Եթե տարիներ շարունակ մեր հասարակությունը, ընդդիմությունը խոսել է ֆունդամենտալ փոփոխությունների պահանջի մասին և խոսվել է, որ մենք անձերի, պաշտոնյայի փոփոխություն չենք ցանկանում: Մենք ցանկանում ենք համակարգային լուրջ, ավելի մեծ փոփոխություն, քան այս փոփոխությունն է: Սա լուրջ ռեֆորմ է, գլոբալ ֆունդամենտալ և իր մեջ ռիսկեր պարունակող, և կարծում եմ հիմա դեմ դուրս գալ այս ֆունդամենտալ փոփոխությանը, այնքան էլ տրամաբանական չէ: Եվ չեմ նշում, որ տեխնիկապես էլ իրենց ասածը հնարավոր չէ, որովհետև Հանրապետության նախագահը ՀՀԿ խորհրդի նիստին հստակ ասաց, որ ինքը իր լիազորությունները ժամանակից շուտ վայր չի դնի:

Այսօր ցույց տվեք մի կուսակցություն, որը ավելի կայացած է, ավելի կուռ կառուցվածք ունի, որը իր թերություններով հանդերձ՝ կարողանում է ղեկավարել:

Տիկին Աճեմյան, ամայացրել, ոչնչացրել եք քաղաքական դաշտը, գլխատել եք Ձեր գլխավոր հակառակորդ կուսակցություններին:

-Բոլորովին, օրինակ՝ «Ժառանգություն» կուսակցության անդամները երբեմն հայտնում են իրենց տեսակետները: Հասկանում եմ, որ կա և պետք է զարգանա ներկուսակցական ժողովրդավարությունը, բայց երբ կուսակցության անդամները իրարից անտեղյակ են. եկան մի դաշինքով ԱԺ, այդ դաշինքից ոչինչ չմնաց, նույնը վերաբերում է ՀԱԿ-ին: Ես ցավով եմ դա ասում, բայց պետք է նշել, որ եթե ներսում այդքան խնդիր ունեն, եթե ներսում չկա կոնսենսուս, եթե չեն կարողանում համախմբվել որևէ գաղափարի շուրջ, ապա մեզ չմեղադրեն, որովհետև մենք դա կարողանում ենք անել: Այո, բոլոր թերություններով հանդերձ՝ ՀՀԿ-ն այսօր միակն է, որը կարող է ղեկավարել:

Դուք փաստորեն օրենսդրորեն ուզում եք ամրագրել ՀՀԿ-ի հարատև իշխելու ցանկությունը:

-Ո՛չ: Օրերս ՀՅԴ ներկայացուցիչներից Արմեն Ռուստամյանը նշեց, որ 25 տարի իրենք սպասում էին այս փոփոխությանը, որ փոփոխությունը պետք է, ինքս էլ համաձայն եմ, բայց որ մենք 95 թվականին շատ լավ սահմանադրություն ենք ունեցել, բայց 2005 թվականի պահանջն էր փոփոխությունները սահմանադրությունում:

Պահանջը բացառապես բացատրվում էր Քոչարյանի իշխանությունը պահելու նկրտումներով: Այսինքն՝ սահմանադրություն էր գրվում կոնկրետ օրվա իշխանությունների համար:

-Ես համարում եմ, որ քաղաքական դաշտը փոխվում է, կյանքը դինամիկ տեմպով զարգանում է:

Բայց Ձեր ցանկությունները չեն փոխվում: Դուք ուզում եք մնալ որպես իշխանություն:

-Դա բնական է: Եվ պետք է նշեմ, որ պառլամենտական կառավարումը սա ամենաժողովրդավար ձևն է:

Տիկին Աճեմյան, բայց դրա իրականացնողը լուրջ լեգիտիմության խնդիր ունի հասարակության մեջ, և ձեր ընդդիմախոսները հիմնականում դրա մասին են խոսում, որ նույնիսկ ամենալավ փոփոխությունները չի կարելի վստահել ՀՀԿ-ին, որովհետև այն չի վայելում ժողովրդի մեծամասնության վստահությունը:

-Եթե այս փոփոխությամբ ժողովրդավարությունը չներդրվի, կուսակցությունները չվերանայեն և՛ իրենց դիրքորոշումները, և՛ քաղաքական կուրսը, իհարկե, ոչինչ չի փոխվի, բայց ես կարծում եմ, որ սա մի մեծ հնարավորություն է, որը մեզ տանելու է ավելի խոր ժողովրդավարության, որը մեզ տանելու է միասին աշխատելու: Եվ այս կայուն մեծամասնությունը, որը պետք է ձևավորվի այս համակարգում՝ նշանակում է կոնսոլիդացիա:

  • Դիտումներ՝ *