ԱՄՆ Էներգետիկ տեղեկատվության վարչությունը հրապարակել է պահուստներում նավթի հումքի ծավալների վերաբերյալ հերթական տվյալները՝ դրանով իսկ վերջ դնելով վաճառողների և վերլուծաբանների հույսերին, ովքեր սպասում էին, որ նավթի պաշարները կկրճատվեն։ Վարչության հաշվետվության համաձայն՝ պաշարները ոչ միայն չեն նվազել, այլև հակառակը՝ ավելացել են 2.6 մլն բարելով՝ հասնելով 456.2 միլիոնի։ Դրան զգալիորեն նպաստել է Կանադայից նավթի ներկրման ռեկորդային աճը (օրական 3.4 մլն բարել) և վթարը Ինդիանայում BP-ի խոշոր նավթավերամշակող գործարանում։
Այդ նորություններն անմիջապես անդրադարձել են գների վրա։ WTI արևմտատեխասյան թեթև նավթի սեպտեմբերյան ֆյուչերսների արժեքը նյույորքյան NYMEX բորսայում ընկել են 5 տոկոսով՝ հասնելով մեկ բարելի դիմաց 40.6 դոլարի, այսինքն՝ 2009-ի սկզբի ցուցանիշների։ Brent տեսակի նավթի հոկտեմբերյան պայմանագրերի արժեքը նվազել է ICE բորսայում մինչև 46.81 դոլար՝ հունվարից ի վեր ամենացածր ցուցանիշի։
Վերլուծաբանները հոռետես են իրենց կանխատեսումներում։ Ամենատխուր կանխատեսումները ներկայացրել են CNN-ի կողմից հարցված վերլուծաբանները։ «Չկա որևէ հիմք ենթադրելու, որ հասել ենք հատակին։ Նավթը հեշտությամբ կարող է հասնել մինչև 20 դոլարի, նաև մինչև 15 դոլարի»,- ասել է Cumberland Advisors-ի ներկայացուցիչ Դևիդ Կոտոկը։
Աշխարհն ունի ավելի շատ նավթ, քան պահանջվում է։ Եվ եթե նավթի մեկ բարելի 15 դոլար մակարդակը դեռևս շատերի համար ֆանտաստիկայի ժանրից է, պարբերականը հիշեցնում է, որ նավթի մի շարք տեսակներ արդեն իրացվում են բավականին ցածր գնով։ Մասնավորապես, մեկ բարել արևմտականադական ծանր նավթի գինը տատանվում է 20 դոլարի սահմաններում։
