Թուրքիայի վարչապետ Ահմեթ Դավութօղլուն հայտարարել է, որ երկրում հնարավոր են նոր ընտրություններ, քանի որ կոալիցիոն կառավարություն չի ձևավորվում։ Ակօս» շաբաթաթերթի հայկական բաժնի խմբագիր Բագրատ Էստուկյանը «Առաջին լրատվական»-ի հետ զրույցում նշեց, որ իրականում սա վարչապետի ցանկության հետևանքն է, ոչ թե այն, որ անհնար է կառավարություն ձևավորել։
«Հատկապես նախագահ Էրդողանը չցանկացավ, որ այլախոհական կառավարություն կազմվի։ Հավանաբար նա ցանկանում է նոր ընտրությունների գնալ, որի նպատակը Ժողովուրդների դեմոկրատական կուսակցությունն արանքից դուրս բերելն է լինելու։ Դրա համար էլ հիմա երկրում ավելի շատ պատերազմական վիճակ են փորձում ստեղծել։ Այս պահին երկրի ներսում ամեն տեղ բախումներ են: Դա միտումնավոր քաղաքականություն է, և կուզեմ, որ այն ինքն իրեն խաղաղ ավարտի տանի։ Բայց թե այդ ուղղությունն իր արդյունքը կտա, թե ոչ, ամենայն հավանականությամբ՝ ոչ։ Տեսնենք, թե ինչ կլինի»,- ասաց Բագրատ Էստուկյանը։
Կարծում եք՝ այս ամենը Թուրքիայի ժողովրդավարությանը դեմ գնացող քայլե՞ր են։ Կարելի՞ է ասել, որ մի քանի տարի առաջ Թուրքիան ավելի ժողովրդավար էր, քան այսօր՝ հարցին Բագրատ Էստուկյանը պատասխանեց. «Այո, այս ամենը ժողովրդավարության դեմ ուղղված քայլեր են, հատկապես, որ քրդամետ կուսակցությունը թուլացնելուն, ասպարեզից դուրս թողնելուն ուղղված քայլեր են։ Ժողովրդավարությունն ամենից շատ ներկայացնողը հենց քրդամետ կուսակցությունն է»։
Անդրադառնալով օրերս հայկական որբանոցի վրա տեղի ունեցած հարձակմանը՝ Բագրատ Էստուկյանը նշեց, որ այդ որբանոցը 35 տարի առաջ անօրինական կերպով խլվել է հայերից, և հիմա հայ երիտասարդությունը կարևոր դիմադրություն կազմակերպեց։ Դիմադրության 100-րդ օրը մի խումբ անհայտ անձինք հարձակում են գործել «Քամփ Արմեն» որբանոցի վրա և ծեծի ենթարկել հայ տղաներին։ Երկու հայ տղաներ վիրավորվել են։
Վերջին խորհրդարանական ընտրություններից հետո շատերն ասում էին, որ նոր Թուրքիա է ձևավորվել։ Հարցին՝ հիմա այս նոր Թուրքիան ի՞նչ խնդիրներ ունի, և եթե երկրում նոր ընտրություններ տեղի ունենան, դրանք ի՞նչ կտան, Բագրատ Էստուկյանը արձագանքեց. «Նոր Թուրքիա դեռ չի ձևավորվել, բայց ձևավորելու ցանկություն կա, բայց կա նաև ավանդական մտայնություն, որի կրողը գործող իշխանությունն ու կառավարությունն են։ Էրդողանն իր այդ քաղաքականությամբ երկիրը հետ է ուզում պահել զարգացումից»։
Իսկ որքանո՞վ դա Էրդողանին կհաջողվի, և ի՞նչ հետևանքներով է դա հղի։ Բագրատ Էստիկյանի խոսքով՝
Էրդողանի ռազմավարությունը ցանկացած դեպքում հաջողություն չի ունենա, կձախողվի, բայց այդ ձախողումը երկրին թանկ կարժենա։ Էրդողանը հիմա ժողովրդի մեջ թշնամություն սերմանելու քաղաքականություն է որդեգրել։ Նա այս ամենն անում է իսլամական գաղափարախոսության վրա հենվելով։ Սա լավ տեղ չի տանելու։
