Հայաստանի ազգային հավաքականի և Դորտմունդի «Բորուսիա»-ի կիսապաշտպան Հենրիխ Մխիթարյանը հարցազրույց է տվել գերմանական Der Westen պարբերականին։
–Ձեր որոշ թիմակիցներ ժամկետից շուտ երկարաձգեցին ակումբի հետ պայմանագրի ժամկետը։ Չե՞ք ցանկանում հետևել նրանց օրինակին։
-Պայմանագիրս նախատեսված է մինչև 2017թ․, բայց Դորտմունդում հաճույքով կմնամ ավելի երկար ժամանակ։ Իհարկե, չենք կարող իմանալ՝ ինչ կլինի վաղը, բայց ամբողջովին կենտրոնացած եմ «Բորուսիա»-ի վրա։ Ինձ համար կարևոր է միայն այն, ինչ կա այստեղ և հիմա։
–Ի՞նչ դեր ունեցավ Տոմաս Տուխելը Ձեր՝ լավ մարզավիճակ ձեռք բերելու հարցում։
-Նա ինձ շատ է օգնում մարզումներին։ Մարզիչը բացատրեց՝ ինչպես խաղադաշտում ցուցադրեմ այն ամենը, ինչի ընդունակ եմ։ Բայց դա վերաբերում է ոչ միայն ինձ, այլև բոլորին։
–Իսկ ինչպե՞ս է նա աշխատում թիմի հետ։
-Նա շատ նրբորեն է կատարում իր աշխատանքը։ Ինձ համար նշանակություն ունի յուրաքանչյուր մանրուք։ Նա լավ գիտի՝ ինչ պետք է անել, որպեսզի թիմը դառնա ավելի ուժեղ։ Նա գիտի՝ ինչպես մեզ դա բացատրել։ Տոմաս Տուխելը «Բորուսիա»-ին համապատասխան մարզիչ է։
–Նախորդ մրցաշրջանը Ձեզ համար կորուսյալ համարու՞մ եք:
-Այդպես չէի ասի։ Երկու քայլ առաջ կատարելու համար երբեմն ստիպված ես մեկ քայլ հետ կատարել։ Անհնար է ամբողջ կյանք ապրել առանց նահանջների։ Մարդը պետք է երբեմն բախվի դժվարությունների, որպեսզի իմանա՝ ինչպես դրանք հաղթահարել։
–Բավականին լավ անցկացրիք «Բորուսիա»-ում Ձեր առաջին մրցաշրջանը։ Նախորդ մրցաշրջանում բոլորը Ձեզնից ավելին էին ակնկալում։ Կարո՞ղ եք առաջիկա մրցաշրջանն ավելի լավ անցկացնել։
-Նախապես ոչինչ չեմ ասի։ Երբեք չեմ մոռանում նպատակս ու միշտ հիշում եմ՝ հանուն ինչի եմ դուրս գալիս խաղադաշտ։ Վստահ եմ, որ լավ մրցաշրջան կանցկացնենք։ Միայն մրցաշրջանի ավարտից հետո կարող եմ ասել՝ այն լավագույնն էր ինձ համար, թե ոչ։
