Արարատի մարզի Նոր Խարբերդ համայնքի մի քանի թաղամասերում ապրիլ ամսից սկսած՝ մեծից փոքր ջուր են կրում. համայնքում ո՛չ խմելու, ո՛չ ոռոգման ջուր չկա, եթե նախկինում 1 ժամ օրկան ջուր են տվել, ամռան տապին անգամ օրվա ընթացքում կես ժամով ջուր չեն տալիս: «Առաջին լրատվական»-ի հետ զրույցում բնակիչները նշեցին, որ հղի հարսներն են ջուր կրում.
«Ջրմուղ դիմում ենք, ասում են ջուրը տվել են, հետո էլ ծաղրում, թե ամառը անցավ, կկարգավորվի, ջուրը շատ է օգտագործվում. մենք ուզում ենք լողանալ, ջուր խմել, մեր երեխեքին լողացնել, էլ չասեմ, որ հողամասերը չորացել են»,- բարկացած ընդգծեցին բնակիչները:
Նրանք համոզված են, որ ջուր կա, բայց իրենց չեն տալիս. «Եթե ջուր չկա, հենա էս կողմում մարզպետի հացի փուռն ա, ընդեղ ջուր կա, էտ ոնցա՞, ասում են՝ ուրիշ համայնքից է ընդեղի ջուրը, ինչա՞, առանձին գիծա քաշե՞լ, սուտա, կամ ոնցա՞ ստեղ հարուստների բասեինը լիքը ջուր կա, ավել փող են տալիս»,- մանրամասնեցին նրանք:
Բնակիչները նաև ասացին, որ խարբերդցիներն այս պահին հավաքվել են գյուղապետ Կամո Կակոյանի աշխատասենյակում և պահանջում են լուծում տալ իրենց խնդրին, եկել է նաև մարզապետը, խոստումներ են տվել, բայց ոչ մի ստույգ բան չեն ասել, թե ջուր երբ կլինի:
Համայնքի բնակիչները նաև նկատեցին, որ եթե խնդրին լուծում չտրվի, ճանապարհը կփակեն, կշրջափակեն Հովիկ Աբրահամյանի մեքենան, դուրս կհրավիրեն զրուցելու, քանի որ կարծում են, որ իրենց խնդրի գլխավոր հասցեատերը վարաչեպտն է: Բացի այդ՝ բնակիչները շեշտեցին, որ ոտաբոբիկ գնալու են Ջրմուղի պետի մոտ, կանգեն նրա սեղանին, որպեսզի կեղտոտ ոտքերը տեսնի և հասակա, թե ինչ վիճակում են ապրում. «Տեսենք դուր կգա՞ր, որ իրա կինը այդ օրին լիներ, մեզ ծաղրում է. դե կտեսնեն»,- ասացին նրանք:
Մինչ բնակիչները բարկացած ներկայացնում էին ջրի խնդիրը, մեզ մոտեցավ նաև գյուղապետ Կամո Կակոյանը: Նա վստահեցրեց, որ իրենց տանը ևս ջուր չկա, ասաց, որ այս պահին բանակցում են թե՛ ջրմուղի, թե՛ մարզապետի հետ, բայց թե ջուրը երբ կլինի, չի կարող ասել: Նա նաև պաշտպանեց մարզպետ Ռուբիկ Աբրահամյանին՝ վստահեցնելով, որ նրա հացի փռի ջուրը Նոր Խարբերդինը չէ:
Մանրամասները՝ տեսանյութում:
