Թեև նաիրիտցիների աշխատավարձն այսօր ամբողջությամբ վճարվել է, սակայն նրանց պայքարը դեռ չի ավարտվել։ Սեպտեմբերից կվերսկսեն գործարանի վերագործարկմանն ուղղված հանրահավաքները, եթե կառավարությունն այդ ուղղությամբ քայլեր չանի։ «Առաջին լրատվական»-ի հետ զրույցում այդ մասին հայտնեց գործարանի նախկին մամուլի խոսնակ Անուշ Հարությունյանը։
«Վերջին 600 աշխատակցի աշխատավարձը վճարվել է, և փաստորեն Նաիրիտի 2400 աշխատողների աշխատավարձն ամբողջովին փակված է, այլևս նաիրիտցիների աշխատավարձի պարտքի խնդիր գոյություն չունի»,- ասաց Անուշ Հարությունյանը՝ շեշտելով, որ գոյություն ունի մեկ այլ խնդիր։
«Նաիրիտը» պետք է վերագործարկվի, և դրա հետ կապված մեր պայքարը անպայման կշարունակվի։ Աշխատավարձի խնդիրը առաջնային էր, քանի որ մարդիկ ունեին կենցաղային խնդիրներ։ Հիմա, քանի որ հարցը փակված է, այս պահին ունենք վերագործարկման խնդիր, որի համար պայքարը կսկսենք սեպտեմբերից, բայց ուղղությունները կախված կլինեն կառավարության գործելաոճից։ Եթե շարունակվեն գործարանը փակելու, լիկվիդացնելու խոսակցությունները, մեր պայքարը այլ կերպ կլինի, իսկ եթե տեսնենք, որ կառուցողական մոտեցում է, ու կառավարությունը փորձում է ներդրողներ գտնել, այդ ուղղությամբ քայլեր անել, մեր գործողություններն արդեն զուտ աջակցման գործողություններ կլինեն»,- ասաց Անուշ Հարությունյանը։
Ըստ մեր զրուցակցի՝ նաիրիտցիների պայքարը կավարտվի, երբ գործարանը կսկսի աշխատել։
