Ամերիկյան Associated Press լրատվական գործակալության փոխանցմամբ՝ Ցյուրիխի օդանավակայանի մաքսային ծառայության աշխատակիցները առգրավել են ռեկորդային ծավալով մաքսանենգ բեռ։ Այդ մասին հայտարարել են Շվեյցարիայի իշխանությունների ներկայացուցիչները։
Չինաստանի երեք քաղաքացիներ, որոնք տարանցման նպատակով ժամանել են Տանզանիայից, փորձել են Շվեյցարիայի տարածքով անցկացնել 262 կիլոգրամ փղի ժանիքներ, որոնց համար անհրաժեշտ էր սպանել առնվազն 40-50 փիղ։
Առգրավված բեռը գնահատվում է մոտ 400.000 շվեյցարական ֆրանկ (413.000 դոլար)։ Մաքսանենգության դեպքը գրանցվել է դեռևս հուլիսի 6-ին, սակայն այդ մասին հայտնի է դարձել միայն այժմ։
Հիշեցնենք. մեկ տարի առաջ հաղորդվել էր, որ երկու տարում որսագողերն Աֆրիկայում սպանել են մոտ 100.000 փիղ, և որ այդ միտումը պահպանվելու դեպքում աֆրիկյան փղերը կարող են իսպառ անհետանալ:
Հետազոտողների տվյալներով` որսագողերը 2010-2012 թվականներին ոչնչացրել են Երկրի մոտ 100.000 խոշորագույն կաթնասուն: Փղերի որսի ակտիվացումը կապված է Չինաստանում և ասիական այլ երկրներում նրանց ոսկրի պահանջարկի մեծացման հետ: Վերջին գնահատականներով՝ վայրի բնության մեջ մնացել է մոտ 500.000-600.000 փիղ: