ՀԱԿ-ի անդամ Տիգրան Առաքելյանի կալանավորումը կարծես թե առանձնապես քաղաքական մեծ աղմուկ չի առաջացրել, ինչը գուցե և դեռ առջևում է: Սակայն այս գործը իսկապես հետաքրքրական բնույթ ունի և կարող է հեռուն տանող ազդակներ ունենալ ողջ քաղաքական և իշխանական դաշտի համար:
Ինչպես հայտնի է, Տիգրան Առաքելյանին մեղադրում են որոշ ՀՀԿ-ական գործիչներից գումար կորզելու փորձերի համար, որ նա, ըստ մեղադրական վարկածի, արել է այդ գործիչների մասնակցությամբ սեռական բնույթի տեսագրություններով շանտաժի միջոցով:
Այս գործի մանրամասները դեռ հայտնի չեն, սակայն իրավիճակն ինքնին ինչ-որ առումով արտառոց է հայաստանյան իրականության համար, իսկ ինչ-որ առումով էլ՝ սովորական: Սովորական է այն իմաստով, որ կոմպրոմատների առկայությունն ու առատությունը հայաստանյան քաղաքական իրականության մեջ նորություն չէ: Արտառոց է այն տեսանկյունից, որ կարծես թե առաջին անգամ ազդարարվում է քաղաքական դաշտում սեռական բնույթի կոմպրոմատների առկայությունը:
Եվ ահա այս տեսանկյունից է, որ գործը բավական ուշագրավ է և ավելի լայն դիապազոն ունի, երևի թե, քան զուտ Տիգրան Առաքելյանի հասցեին մեղադրանքը և քննությունը:
Ըստ էության, կարելի է ենթադրել, որ այս գործով ավելի մեծ ազդակ է հղվում իշխանության ներկայացուցիչներին, իսկ միգուցե նաև քաղաքական դաշտին ընդհանրապես, որ առկա են նմանօրինակ կոմպրոմատներ, և որոնք կարող են հասանելի դառնալ հասարակությանը:
Եթե ընդունենք, որ Տիգրան Առաքելյանի ձեռքում իսկապես եղել են նման տեսագրություններ, ինչպես պաշտոնական վարկածն է ասում, ապա միանգամայն տրամաբանական է, որ նման տեսագրությունները կարող են հայտնվել նաև շատ այլ ձեռքերում կամ տեղերում: Այսինքն՝ ըստ էության առկա է նախազգուշացման տարրը, թե ում, ինչու, ինչպես՝ դա արդեն այլ հարց է, և նա, ում նախազգուշացնում են, երևի թե հաստատ կհասկանա մեսիջը:
Իսկ քանի որ Հայաստանում իշխանությունը ներհամակարգային հակասությունների բուռն կծիկով մտնում է վերարտադրության և վերաբաժանման բավական հանգուցային փուլերից մեկը՝ սահմանադրական բարեփոխումների խնդրով և ընտրական առաջիկա գործընթացներով, ապա պետք է իհարկե ենթադրել, որ ներիշխանական պայքարը կստանա շատ կոշտ բնույթ և կլինի իրավիճակի ընդհանուր կառավարելիության կարիք նաև:
Այս իրավիճակում իհարկե կոմպրոմատները ոչ միայն ավելորդ չեն լինում, այլև ըստ էության լինում են և ազդեցության, և կառավարելիության հիմնական գործիքներից մեկը: