Al Arabiya հեռուստաալիքի փոխանցմամբ՝ ԴԱԻՇ ահաբեկչական խմբավորման զինյալները երկու շաբաթվա ընթացքում Իրաքի Մոսուլ քաղաքում հաշվեհարդար են տեսել 2000 մարդու նկատմամբ։ Սպանվածների մեծ մասը եղել են նախկին զինծառայողներ ու ոստիկանության աշխատակիցներ, ինչպես նաև տեղի պաշտոնյաներ։
Մոսուլն Իրաքի երկրորդ խոշոր քաղաքն է։ Իրաքյան բանակն այն գործնականում առանց մարտի ԴԱԻՇ-ին հանձնել է նախորդ տարվա հունիսի 10-ին։ Այժմ Մոսուլի ազատագրումը իրաքյան բանակի ու նրան աջակցող ժողովրդական աշխարհազորի ձեռնարկած գործողության հիմնական նպատակն է։ Ներկա դրությամբ կատաղի մարտեր են ընթանում հարևան Անբար նահանգում, որտեղ կառավարական ուժերը հարձակում են ձեռնարկել տարածաշրջանի երկու առանցքային քաղաքների՝ Ռամադիի ու Էլ-Ֆալուջայի ուղղությամբ։