Թուրքական Dünya Bülteni լրատվական կենտրոնի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալները շարունակում են իրենց հարձակումների շարքը Թուրքիայի արևելյան ու հարավարևելյան նահանգներում։
PKK-ի զինյալները Դիարբեքիրի նահանգի Քուլփ շրջանում նռնականետով հարվածել են տեղի ոստիկանատանը։ Զոհերի ու ավերածությունների մասին չի հաղորդվել։ Միջադեպը գրանցվել է երեկ, մոտ ժամը 22.30-ին։
Մեկ այլ հարձակում գրանցվել է Բինգյոլ նահանգի Քիղլը շրջանում, որտեղ թուրքական զրահամեքենան պայթել է ճանապարհին PKK-ի զինյալների տեղադրած ականի վրա։ Պայթյունն իրականացվել է հեռակառավարմամբ։ Զոհեր չեն գրանցվել, սակայն պայթյունից վնասվել են զրահամեքենան ու ճանապարհը։
Բացի այդ, PKK-ականները Մարդինի նահանգի Նուսայբին շրջանում կտրել են ճանապարհը և հրկիզել երկու ավտոմեքենա։ PKK-ականները ավտոմեքենաների վարորդներին ու ուղևորներին իջեցրել են մեքենաներից, քարոզչություն են իրականացրել նրանց շրջանում, ապա այրելով մեքենաները՝ հեռացել են դեպքի վայրից։
PKK-ականները Շըրնաք նահանգի Արաքյոյ գյուղի մոտ հարձակվել են զինվորական փոխադրամիջոցի վրա՝ սպանելով երկու զինծառայողի։ Եվս մեկական զինծառայող ու գյուղական պահապան վիրավորվել է։
Հիշեցնենք, որ գյուղական պահապանների (քուրդ վարձկաններ) համակարգը Թուրքիայում ստեղծվել է 1985 թվականի մարտի 26-ին ընդունված թիվ 442 Գյուղական կանոնի հիման վրա։ Թուրքիայում PKK-ի ակտիվ զինված պայքարը մեկնարկել է 1984 թվականին։
Գյուղական պահապանները վարչական առումով գտնվում են շրջանի ղեկավարի ենթակայության, իսկ մասնագիտական (պրոֆեսիոնալ) առումով՝ Ժանդարմերիայի հրամանատարության ներքո։ Գյուղական պահապանների գործունեությունը հիմնականում սահմանափակվել է իրենց գյուղերի սահմաններում, իսկ անհրաժեշտության դեպքում՝ նաև դրանցից դուրս։
Նրանց առաջադրանքներն են գյուղերի բնակչության անվտանգության ապահովումը զինված հարձակումներից (PKK), այդ հարձակումների մասին Ժանդարմերիայի մոտակա ստորաբաժանմանը ժամանակին իրազեկելը, գյուղերից մարդկանց առևանգմանը խոչընդոտելը և այլն։
Գյուղական պահապանների թիվը հասնում է մոտ 80.000-ի։ Որոշակի տվյալներով` 1984-1999 թվականներին գյուղական պահապաններին վճարվել է 450 միլիոն դոլար աշխատավարձ։ 2013 թվականին Թուրքիայում ձեռք բերված հրադադարի ժամանակ շատ էր խոսվում այն մասին, որ Թուրքիայի իշխանությունները պետք է լուծեն նաև PKK-ի դեմ պայքարի շրջանակներում ստեղծված գյուղական պահապանների համակարգի հարցը: Գյուղական պահապանները գտնում են, որ իրենք գտնվում են PKK-ականների թիրախում, և որ պետությունը պետք է, PKK-ի հետ հաշտվելուց բացի, իրենց նույնպես հաշտեցնի PKK-ի հետ, քանի որ, հակառակ դեպքում Թուրքիայում կարող է սկսվել արյունոտ վրեժխնդրության ժամանակաշրջան:
