Ռուսական TASS լրատվական գործակալության փոխանցմամբ՝ բեռնարկղեր փոխադրող առաջին փորձնական գնացքը, հաղթահարելով ավելի քան 3500 կիլոմետր, Չինաստանից անդրկասպյան երթուղով երեկ ժամանել է Ադրբեջան։
Գնացքը կազմված է 41 վագոնից։ Այն Չինաստանի Շիխեցզի նահանգից դուրս է եկել հուլիսի 28-ին և 5 օրվա ընթացքում Դոստիկ-Ակտաու (Ղազախստան) երթուղով 1771.2 տոննա կաուստիկ սոդա է հասցրել Ալյաթ նավահանգիստ (Բաքվի շրջակայք)։ Այս մասին հայտարարել է «Ղազախստանի երկաթուղիներ» ընկերության մամլո ծառայությունը։
Ընկերության նախագահ Ասկար Մամինը հայտարարել է, որ անդրկասպյան երթուղին ունի վիթխարի պոտենցիալ, որը Ղազախստանն ու Ադրբեջանը կվերածի Ասիայի ու Եվրոպայի միջև տարանցիկ կամրջի։
Նա հավելել է, որ Չինաստանից Ղազախստանի միջոցով դեպի Ադրբեջան, Վրաստան, Թուրքիա ձգվող երթուղին կնպաստի Ղազախստանի արտահանման ու տարանցիկ պոտենցիալի ընդլայնմանը, ինչպես նաև Անդրկասպյան միջազգային տրանսպորտային երթուղու մրցունակության աճին։
