Աբովյանում քաղաքապետի թեժ ընտրապայքարի փուլում խոսվում էր, որ Ծառուկյանի թեկնածուի ընտրությունից հետո սպասվում է հակառակորդի՝ «Քինգ Դելյուքս» ընկերության տնօրեն, Պալաչ մականունով Արթուր Հարությունյանի նկատմամբ հաշվեհարդարը, ինչը սկսվելու էր իր բիզնեսներից։ Արթուր Հարությունյանը իրականացնում է Աբովյան քաղաքի ուղևորափոխադրումը։ Բացի ներքաղաքայինից՝ իրականացնում է նաև միջքաղաքային, միջմարզային ուղևորափոխադրում։ Հիմա, կարծես թե, քաղաքային իշխանությունը տրամադրվել է Արթուր Հարությունյանին զրկել ներքաղաքային ուղևորափոխադրումից։
Աբովյանի քաղաքապետ Վահագն Գևորգյանը Համահայկական խաղերի բացման միջոցառումից հետո «Առաջին լրատվական»-ի հետ զրույցում հայտնեց, որ քաղաքացիները իրեն բողոքել են ուղևորափոխադրման որակից։ Մեր դիտարկմանը, թե մի գուցե Ծառուկյանի կողմնակիցներն են կազմակերպված դժգոհում, որպեսզի համատեղ ուժերով նրան զրկեն այդ բիզնեսից, Վահագն Գևորգյանը պատասխանեց.
«Ներքաղաքային տրանսպորտը, որը որ Արթուր Հարությունյանինն է, նորմալ չի աշխատում, այն ինչ վերաբերում է միջքաղաքայինին, միջմարզայինին, ես որևէ մասնակցություն չունեմ, բայց կարող եք գալ ազգաբնակչությունից հարցնել՝ 7-8-րդ միկրոշրջաններում, Սարալանջ թաղամասում նորմալ չի աշխատում։ Առաջիկայում սպասվում է նոր մրցույթ, ու կփորձենք ներգրավել նորմալ կազմակերպությունների, որոնք որ առաջիկա տարիներին կկարողանան Աբովյանում նորմալ ուղևորափոխադրումներ իրականացնել»։
Մեր հարցին, թե իր խոսքերից տպավորություն է, որ զրկելու են Արթուր Հարությունյանին իր բիզնեսից, ինչի մասին ավելի վաղ կանխատեսումներ կային, նշեց.
«Ես չեմ ասել, որ զրկելու ենք, կարող է և ինքը շահի, տա Աստված մրցույթը շահի և իրականացնի, իմ խնդիրն այն է, որ նորմալ ուղևորափոխադրում կատարվի Աբովյանում»։
Հետաքրքրվեցինք նաև Աբովյանում Ծառուկյանների ստեղծած վախի մթնոլորտի, ինչպես նաև նախկին քաղաքապետ Կարապետ Գուլոյանից ժառանգած խնդիրների ու չլուծված հարցերի մասին։
Ավելին՝ տեսանյութում։
