Իրաքի Ղանդիլ լեռնային շրջանում քրդական Զերքելե գյուղի վրա Թուրքիայի ռազմաօդային ուժերի հարձակման հետևանքով զոհվել է 9 խաղաղ բնակիչ: Առնվազն 15 մարդ վիրավորվել է՝ հաղորդում է Firat News-ը:
«Ավերվել է 6 տուն: Դրանցում չեն եղել Քրդստանի աշխատավորական կուսակցության (PKK) զինյալներից, որոնց հետ պատերազմում է Թուրքիան: Եղել են միայն գյուղացիներ և նրանց ընտանիքները»,- ասել է ականատես Ֆեքի Մուհամեդը:
Այդ կապակցությամբ իրաքցի քրդերի առաջնորդ Մասուդ Բարզանին PKK-ին կոչ է արել «Իրաքյան Քրդստանի տարածքից չեզոքացնել իր բազաներն ու ճամբարները և այնտեղից դուրս բերել իր զինված միավորումները»: Նրա խոսքով՝ «դա անհրաժեշտ է, որպեսզի տարածաշրջանում խաղաղ բնակիչները հակամարտության զոհեր չդառնան»: