18-ամյա նորակոչիկ Նորայր Սահակյանի մահվան գործով 2012-ին տեղի ունեցած դատավարությունն անտեղի ձգձգվում է, մինչդեռ գործով փաստերն այնքան շատ են ու այնքան անառարկելի, որ դատավարությունը վաղուց պետք է ավարտված լիներ, իսկ մեղավորները՝ պատժված: Այս մասին «Առաջին լրատվական»-ի հետ զրույցում ասացին Նորայրի ծնողները:
Գործով 4 մեղադրյալներ միջնորդություն են ներկայացրել, որպեսզի Նորայրի մահվան հանգամանքների մասով լրացուցիչ փորձաքննություն նշանակվի, ընդ որում՝ առաջարկելով, որ փորձաքննությունն անցկացնեն իրենց մատնանշած կենտրոնը և փորձագետները:
«Բայց ինչո՞ւ, Ասոյանի ու փորձաքննությանը մասնակցած մյուս հեղինակավոր անձինք հանրապետության մեջ լավագույնն են, ինչո՞ւ հանկարծ նրանց տված եզրակացությունը հայտնվեց կասկածի տակ: Եթե դատարանը բավարարի միջնորդությունը, ուրեմն կփաստի, որ էս գործով փող է պտտվել: Բայց դա բացառված բան է, որ լրացուցիչ փորձաքննություն լինի ու ուրիշ եզրակացություն: Ես առողջ տղա եմ ուղարկել բանակ, որին երկու օր հետո մահացած հետ են տվել ինձ: Ու դա եղել է անուշադրության, ամենաթողության արդյունքում, և այդ մարդիկ պետք է պատասխան տան»,- ասաց Նորայրի մայրը՝ տիկին Կարինեն:
Հիշեցնենք, որ Ջրաշեն գյուղում բնակվող Սահակյանների ընտանիքի ավագ որդին՝ Նորայր Սահակյանը, բանակ էր զորակոչվել 2012-ի ձմռանը: Պետք է ծառայեր Խոջալուում, սակայն զորակոչվելուց 45 ժամ հետո զինվորական համազգեստով նրա դին Ղարաբաղից տեղափոխում են հայրենի գյուղ: Նորայրը, ծնողների պնդմամբ, դեկտեմբերի 21-ին Էրեբունու զինկոմիսարիատից լիովին առողջ, առանց որևէ խնդրի, զորակոչվել էր բանակ: Կենտրոնական հավաքակայանում վեց ներարկումներից հետո նրա ջերմությունը բարձրացել էր մինչև 38.3 աստիճան: Նորայրը մոտեցել էր հերթապահ բժշկին՝ հոսպիտալի բժիշկ Կարեն Ջուլհակյանին, որը գինեկոլոգ է, և ասել, որ ջերմություն ունի: Նորայրին մեկ հաբ պարացետամոլ տալով՝ ուղարկել էին Ղարաբաղ: Ճանապարհին Նորայրը դարձյալ վատ է զգացել, փսխել է, բայց նրան օգնություն չեն ցուցաբերել, որևէ միջամտություն չէր եղել: Տեղ հասնելուն պես նրան տեղափոխել էին հոսպիտալ, բայց նրան ոչ մի բժիշկ չէր մոտեցել, որևէ միջամտություն չի արվել, և արդյուքնում, դեկտեմբերի 23-ին Ջրաշենի գյուղապետը ծնողներին հայտնել էր որդու մահվան մասին բոթը:
Դեռևս 2012-ին հարուցվել է քրեական գործ՝ Քրեական օրենսգրքի 376-րդ հոդվածի 2-րդ մասի հատկանիշներով (անփույթ վերաբերմունք ծառայության նկատմամբ, որն անզգուշությամբ առաջացրել է ծանր հետևանքներ), ինչը նախատեսում է 3-6 տարվա ազատազրկում: Քրեական գործ է հարուցվել Կարեն Ջուլհակյանի (հերթապահ մայոր, հավաքակայանի պատասխանատու), ուղեկցող ենթասպա Վարուժան Մանասյանի, հերթապահ բժիշկ Արկադի Չախոյանի, Իվանովոյի ինֆեկցիոն բաժանմունքի պետ Մհեր Դավիդյանցի նկատմամբ (314-րդ հոդվածով և 376-րդ հոդվածի 2-րդ մասով): Մեղադրյալներից որևէ մեկը ներկայումս անազատության մեջ չէ, և Նորայրի հարազատների խոսքով, ամեն ինչ արվում է, որպեսզի օր առաջ նրանք դուրս գան նաև մեղադրյալի կարգավիճակից:
Նշենք, որ Նորայրի կրտսեր եղբայրը՝ Արտյոմը, ևս մահացել է՝ Նորայրի մահից 5 ամիս անց, մայիսին, անզգույշ վայր ընկնելու պատճառով: Նա ևս պետք է ամիսներ անց բանակ զորակոչվեր, բայց եղբոր պես այդպես էլ չհասցրեց վայելել զինվոր դառնալու պատիվը:
Ի դեպ, 1 ամիս առաջ Սահակյանների ընտանիքում համալրում է կատարվել: Տիկին Կարինեն, իր մեջ խեղդելով որդիների կորստի ցավը, իր մեջ ուժ է գտել և լույս աշխարհ բերել ևս մեկ որդի: Նրան կոչել է Արտյոմի անունով: Հիմա մխիթարվում են նորածին Արտյոմով, բայց նշում, որ երբեք ու ոչ մի վայրկյան չեն հանգստանա, մինչև արդարությունը չվերականգնվի, և մեղավորները չպատժվեն:
