Մեծ քաղաքների բնակիչները այսօր օդի աղտոտվածության պատճառով ամեն օր պարտադիր մի քանի անգամ օճառ օգտագործելու կարիք ունեն: Մասնագետների կարծիքով՝ շատերը օճառ ընտրելիս հաշվի են առնում հաճելի բույրը, ինչը շատ սխալ է, գրում է ladyhealth.com.ua-ն:
Բժիշկների կարծիքով՝ ոչ ճիշտ ընտրված օճառը կարող է նույնիսկ վնասել առողջ մաշկին՝ առաջացնելով ալերգիկ վիճակ: Օճառի հաճելի բույրը կարող է նրանում քիմիական նյութերի առկայության արդյունք լինել:
Պետք է զգուշությամբ ընտրել նաև կոշտ օճառը. այն ավելի լավ է մաքրում կեղտը, բայց լինելով հիմնային՝ քայքայիչ ազդեցություն է թողնում մաշկի բնական ճարպային հյուսվածքների վրա:
«Բնական» կոչվող օճառները նույնպես ունեն քիմիական հիմք, պնդում են բժիշկները, սակայն դրանցում ավելի քիչ կոնսերվանտներ կան և ավելի շատ բնական բաղադրիչներ: «Քսուք-օճառ» մակնշումով օճառները կարելի է օգտագործել բոլոր տեսակի մաշկերի համար:
Մարմնի նուրբ հատվածերի համար օճառ ընտրելիս բժիշկները խորհուրդ են տալիս հաշվի առնել մաշկի առանձնահատկությունները. ճարպոտ մաշկի համար խորհուրդ է տրվում ընտրել գելային հիմքով, առանց սպիրտի օճառը:
Պետք չէ նաև անընդհատ օգտագործել գլիցերինե օճառ: Հեղուկ օճառները ավելի քիչ հիմնային նյութեր են պարունակում և նրանց վնասակար ազդեցությունը մաշկի վրա ավելի քիչ է:
Ընդհանրապես օճառ ընտրելիս ավելի լավ է վերցնել «չեզոք տեսակը»:
