Ռուսական TASS լրատվական գործակալության փոխանցմամբ` օգոստոսի կեսերին Չինաստանում ուժի մեջ կմտնեն բարձրտեխնոլոգիական անօդաչու թռչող սարքերի (ԱԹՍ) արտահանման սահմանափակումները:
Այդ ԱԹՍ-երն ունակ են ուժգին քամու պայմաններում թռչել ավելի քան 15 կիլոմետր բարձրության վրա: Բացի դրանից՝ տվյալ սահմանափակումներն առնչվելու են նաև գերհամակարգիչներին, որոնց հզորությունը կազմում է ավելի քան 8 տեռաֆլոպս, այսինքն՝ մեկ վայրկյանում կատարում են ավելի քան 8 տրիլիոն գործողություն:
Աշխարհում ԱԹՍ-երի խոշորագույն արտադրող DJI ընկերության փոխնախագահ Շաո Ցզյանհոն հայտարարել է, որ նման որոշումը թելադրված է առաջադեմ տեխնոլոգիաների պաշտպանության անհրաժեշտությամբ և արդարացված է անվտանգության ու ոլորտի զարգացման տեսանկյունից: Արգելքը նաև հնարավորություն կտա կանխել ռազմական նպատակներով բարձրտեխնոլոգիական թռչող սարքերի օգտագործումը:
