Վերաքննիչ քրեական դատարանի վարույթում է Սլավիկ Խ.-ի գործով բերված վերաքննիչ բողոքի քննությունը:
Գործը քննվել է Արարատի և Վայոց Ձորի մարզերի ընդհանուր իրավասության դատարանում Ռուբիկ Մխիթարյանի նախագահությամբ:
42-ամյա Սլավիկը մեղադրվել է սպանության սպառնալիքներ տալու համար՝ ՀՀ քրեական օրենսգրքի 137 հոդվածի 1-ին մասով՝ 2 դրվագով:
Ըստ մեղադրանքի՝ 2014 թվականի դեկտեմբերի 29-ին, գիշերվա ժամը 2-ին Սլավիկն իր հետ վերցրել է բենզինով լի շիշ, գնացել է մարզի գյուղերից մեկը՝ իր նախկին կնոջ մորը՝ Անահիտին պատկանող տուն, նրան մեղադրել է իր և կնոջ բաժանության համար:
Ձախ ձեռքին պատրաստ պահելով բենզինով լի շիշը, իսկ աջ ձեռքով՝ վառվող ծխախոտը՝ Սլավիկը նախկին զոքանչի հասցեին տվել է սպանության սպառնալիքներ, հայտարարել է, թե սպանելու է նրան՝ բենզինով այրելու, դանակով հարվածելու է:
Նա ամբողջ ընթացքում դրսևորել է ագրեսիվ, վախեցնող, հարձակողական վարքագիծ: Ըստ մեղադրական եզրակացության՝ «սպառնալիքները հնչեցնելիս՝ Սլավիկ Խ.-ն փոխել է դեմքի միմիկաները, ձայնը դարձրել է վճռական, կոնկրետ: Նշված սպառնալիքները որպես հոգեբանական հարկադրանքի ձև օգտագործելով՝ Սլավիկ Խ.-ն տուժողի մոտ առաջացրել է տագնապի, վախի զգացումներ»:
Սլավիկի կողմից տրված սպառնալիքներն իրականացնելու իրական վտանգ զգալով՝ տուժող կինը նրա ձեռքից վերցրել է բենզինով լի շիշն ու դեն է նետել, իսկ երբ տուժողի որդին ասել է, թե ոստիկանություն է զանգահարելու, Սլավիկ Խ.-ն հեռացել է:
Բացի այդ, մի քանի օր անց՝ 2015 թվականի հունվարի 6-ին, ժամը 19-ին Սլավիկ Խ.-ն գնացել է մարզի մեկ այլ գյուղում բնակվող նախկին կնոջ՝ Սաթիկի (անունը փոխված է) տուն, նորից միանալու, համատեղ ապրելու առաջարկ է արել ու վիճել է Սաթիկի հետ, ձեռքին եղած դանակը ուղղել է նախկին կնոջ պարանոցին, տվել է սպանության սպառնալիքներ՝ դարձյալ վախեցնող, հարձակողական տոնով, «դեմքի միմիկաները և ձայնը փոխելով»՝ ասել է, թե կմորթի, կսպանի կնոջը: Վերջինս սպառնալիքներն իրականացնելու իրական վտանգ է զգացել, փորձել է սենյակից դուրս գալ, նրա դուստրը զանգել է ոստիկանություն: Սլավիկ Խ.-ն փախել է:
Ընդհանուր իրավասության դատարանում Սլավիկ Խ.-ն իրեն մեղավոր չի ճանաչել: նա հայտնել է, թե Սաթիկն իր նախկին կինն է, Անահիտը՝ նրա մայրը:
Սաթիկն ամուսնալուծվել է իրենից, երեխաները գտնվում են Սաթիկի մոտ:
2014 թվականի դեկտեմբերի վերջին, կոնկրետ օրը չի հիշում, Սաթիկի հետ ցանկացել է խոսել, գնացել է նրա հայրական տան մոտ, զանգել է, բայց կնոջ հեռախոսն անջատված է եղել: Ինքը զանգել է նրա մայր Անահիտին, պահանջել է, որ նա հեռախոսը փոխանցի Սաթիկին:
Այդ ժամանակ տնից դուրս են եկել նրանց ընտանիքի անդամները, իրեն տարել են հարևանությամբ գտնվող մեկ ուրիշ տուն, այնուհետև այնտեղ են եկել ոստիկանները: Մինչև ոստիկանների գալը նախկին զոքանչ Անահիտը գնացել-եկել՝ իրեն ապտակներ է հասցրել, բայց ինքը ձայն չի հանել: Իրեն զրպարտում են, իր մոտ բենզինով լի շիշ չի եղել, ինքը նախկին զոքանչին սպանելու սպառնալիքներ չի տվել:
Սպանության սպառնալիքներ չի տվել նաև նախկին կնոջը, երբ գնացել է վերջինիս տուն: Այցի նպատակը եղել է այն, որ Ռուսաստան՝ արտագնա աշխատանքի մեկնելու համար ցանկացել է նախկին կնոջից 300 դոլար վերցնել…
Տուժող Անահիտը հայտնել է, որ ամբաստանյալ Սլավիկ Խ.-ն իր դստեր նախկին ամուսինն է: Դստեր հետ համատեղ ապրելու ընթացքում նա մշտապես դրսևորել է վատ վարքագիծ՝ չարաշահել է խմիչքը, վիճել է կնոջ հետ, պարբերաբար նրան ենթարկել է ծեծի: Արդյունքում դուստրը երեխաներին վերցրել ու հեռացել է, այժմ բնակվում է առանձին:
Ամուսնալուծության հարցում Սլավիկը, ըստ տուժողի, մշտապես մեղադրել է իրեն, սպառնացել է:
Դեպքի օրը նա զանգել է իրեն, հայհոյել ու սպառնացել է՝ ասելով՝ թող ամուսինը դագաղ պատվիրի, քանի որ շուտով վառելու, վերացնելու է իրեն: Դրանից հետո, ավելի ուշ ժամի, երբ ցանկացել են իրենց դարպասը փակել, Սլավիկը կանգնած է եղել դռնից երեք-չորս մետր հեռավորության վրա: Ինքը հարցրել է՝ այդ ժամին նա ի՞նչ է անում իրենց տան մոտ: Սլավիկն ագրեսիվ տոնով հայտարարել է, թե եկել է իրեն բենզինով վառելու:
Այդ ժամանակ ինքը նրա մի ձեռքին նկատել է բենզինով շիշ, մյուս ձեռքին՝ վառվող ծխախոտ: Ինքը համոզված է եղել, որ նա ընդունակ է իրեն բենզինով այրելու, վախից ձեռքը գցել-խլել է բենզինով շիշն ու նետել է մի կողմ: Ձայնից դուրս է եկել իր որդին, զանգել է ոստիկանություն, Սլավիկը հեռացել է:
Տուժողը պնդել է, որ սպանելու սպառնալիքներ տալու ժամանակ Սլավիկի պահվածքը եղել է չարացած ու ագրեսիվ, նա բղավել է, իսկ ինքը լարվել ու վախեցել է, հավատացել է, որ նա կարող է իրեն սպանել…
Տուժող Սաթիկը հայտնել է, որ Սլավիկ Խ.-ի հետ գտնվել է փաստական ամուսնական հարաբերությունների մեջ: Բայց 2014 թվականի դեկտեմբերին բաժանվել է նրանից, չորս անչափահաս երեխաների հետ բնակություն է հաստատել մարզի գյուղերից մեկում:
Համատեղ ապրելու ընթացքում Սլավիկը պարբերաբար ծեծել է իրեն, դրան ականատես են եղել երեխաները: Հեռանալուց հետո էլ նա հանգիստ չի թողել իրենց, անընդհատ զանգել է, սպառնացել ու հայհոյել:
2015 թվականի հունվարի 6-ին իր ինքնազգացողությունը վատ է եղել: Ժամը 19-ի սահմաններում ինքը քնած էր, արթնացել է երեխաների բղավոցներից: Տեսել է, որ Սլավիկն է եկել, երեխաները փորձում են չթողնել, որ նա մոտենա իրեն:
Սլավիկը կանգնած էր դանակը ձեռքին, իսկ երեխաները գոռում էին, որ նա չմոտենա ու իրեն չխփի: Բայց նա դանակը պահել է իր պարանոցի ուղղությամբ, ագրեսիվ տոնով ասել է, թե խոզի պես մորթելու է իրեն, իր խռխռոցը լսելուց հետո միայն կարող է հանգստանալ:
Այդ պահին դուստրը ընկել է հոր դեմը, մի պահ կարողացել է դանակը վերցնել նրա ձեռքից, բայց Սլավիկը աղջկանից խլել է դանակը, նորից պահել է իր ուղղությամբ ու ասել է, թե մորթելու է:
Ինքն ու երեխաները սաստիկ վախեցել են, հավատացել են, որ կարող է սպանել: Նրա աչքերը կարմրած ու լայն բացված էին, սպառնալիքները տալիս էր բղավելով ու հայհոյելով: Նա հեռացել է այն բանից հետո, երբ դուստրը զանգել է ոստիկանություն:
Դատարանն արձանագրել է, որ Սլավիկ Խ.-ն նախկինում՝ 2010 թվականին, դատվել է զենքի գործադրմամբ կատարած խուլիգանության համար, դատվածությունը մարված չէ:
Ըստ բնակության վայրի՝ Սլավիկը բնութագրվել է դրական՝ «որպես աշխատասեր, համեստ, բարի, ընտանիքին նվիրված, համայնքի բնակչության հանդեպ հարգալից անձնավորություն»:
Իսկ ըստ մեղադրանքի՝ այդ «ընտանիքին նվիրված հարգալից, բարի, համեստ» անձնավորությունը չորս անչափահաս երեխաների ներկայությամբ Սուրբ Ծնունդի օրը, երեխաներին նվերներ տալու փոխարեն, դանակով սպառնացել է կնոջը՝ ասելով, թե մորթելու է նրան ու լսելու է, թե ինչպես է խոզի պես խռխռացնում…
Անչափահաս երեխաները Սլավիկի խնամքի տակ չեն…
Դատարանն արձանագրել է հանցագործությունների կատարման ռեցիդիվ Սլավիկ Խ.-ի կողմից:
Սլավիկը մեղավոր է ճանաչվել երկու դրվագով սպանության սպառնալիքներ տալու համար՝ ՀՀ քրեական օրենսգրքի 137 հոդվածի 1-ին մասով, վերջնական պատիժ է սահմանվել 1 տարի 2 ամիս ազատազրկումը:
Սլավիկ Խ.-ն կալանքի տակ կառնվի դատավճիռն օրինական ուժ ստանալուց հետո:
Մինչ այդ՝ դատավճիռը բողոքարկել է ամբաստանյալի շահերի պաշտպանը՝ խնդրելով իր պաշտպանյալի նկատմամբ կայացնել արդարացման դատավճիռ կամ նրա նկատմամբ կիրառել պայմանական դատապարտություն:
Վերաքննիչ քրեական դատարան ամբաստանյալի չներկայանալու պատճառով դատական նիստը հետաձգվեց մինչև օգոստոսի 14-ը: