Բաղրամյան պողոտայի հուժկու շարժումից հետո մասնակիցների մի մասը էլեկտրաէներգիայի թանկացման դեմ պայքարը շարունակում են Հանրապետության հրապարակում՝ արդեն որպես «Ոտքի Հայաստան» անվամբ։
Քաղաքագետ Ստեփան Սաֆարյանը «Առաջին լրատվական»-ի հետ զրույցում անդրադարձել է շարժման ընթացքին և պահանջների կատարման հավանականությանը։
«Հունիսի 28-ից հետո, երբ Սերժ Սարգսյանը հայտնի պատասխանը տվեց Բաղրամյանի շարժման պահանջներին, դրանից հետո շարժումը հայտնվել է ճգնաժամի մեջ։ Իհարկե, տարբեր փորձեր արվեցին՝ վերասահմանելու շարժման նոր ռազմավարություն, ակնհայտորեն այդ փորձերը դեռևս արդյունավետ չեն կարող գնահատվել, քանի դեռ մենք չեն տեսնում հանրային լայն աջակցություն այդ ամբողջին»,- ասաց Ստեփան Սաֆարյանը։
Ըստ մեր զրուցակցի՝ որքան էլ փորձ արվեց պայքարը քաղաքականացնել, սակայն չհաջողվեց։
«Որքան էլ խոսվեց պայքարը քաղաքական դարձնելու մասին, այնուամենայնիվ, կարծեք դա տեղի չունեցավ, և այժմ հրապարակում նախաձեռնություն ցուցաբերող «Ոտքի Հայաստան» խումբը կրկին քաղաքացիական պահանջ է առաջ քաշում, և դրել է մի պահանջ, որ կառավարությունը, ըստ էության, արձագանքի, թե ինչի հաշվին է սուբսիդավորելու թանկացումը. դա քաղաքագիտական առումով խոցելի պահանջ է, որովհետև մեր հասարակությանը բացարձակապես պետք չէ, թե ինչի հաշվին կսուբսիդավորվի։ Սա լավ բան չէ, որ ասում եմ, բայց մարդիկ մտածում են, որ եթե իրենց անձնական գրպանից չեն վճարում, ապա որտեղից ուզում են, թող վճարեն, հետևաբար պատահական չէ, որ այդ պահանջը իր հետևից շատ զանգված չի տանում, որովհետև մարդկանց մի մասը համարում է, որ խնդիրը լուծված է, որքան էլ որ նախաձեռնող խումբը փորձում է հասարակությանը ճիշտ հակառակ ուղերձը հասցնել»,- նշեց Սաֆարյանը։
Ավելին՝ տեսանյութում: