«Գանձասար-Կապան»-ի ղեկավար կազմի անդամներ՝ նախագահ Վահե Հակոբյանը, գործադիր տնօրեն Գագիկ Աղաբաբյանը և թիմի տեխնիկական տնօրեն, խորհրդատու մարզիչ Սամվել Պետրոսյանն այսօր հանդիպել են լրագրողների հետ:
«Նոր մրցաշրջանում մեր նպատակը մրցանակային տեղ զբաղեցնելն է լինելու, կարծում եմ, որ թիմը լավ մարզավիճակում է գտնվում, այս մրցաշրջանում հանդես ենք գալու նոր մարզաշապիկներով: Մենք պատրաստ ենք առաջնությանը, զգացվում է, որ Սյունիքում ֆուտբոլը նորից վերելք է ապրում»,- նշել է Վահե Հակոբյանը։
Ակումբի խորհրդատու մարզիչ Սամվել Պետրոսյանը նախ անդրադարձել է թիմի նախապատրաստությանը, այնուհետև հավելել. «Մենք ամենայն լրջությամբ ենք պատրաստվել առաջնությանը, թիմը համալրած նորեկները բավականին լավ տպավորություն են թողնում: Մեր նպատակը եվրոգավաթների ուղեգիր նվաճելն է»:
Ակումբի գործադիր տնօրեն Գառնիկ Աղաբաբայանը նշել է, որ անտեսված չէ նաև մանկապատանեկան ֆուտբոլը, որին մեծ ուշադրություն է դարձվում. «Առաջիկա մրցաշրջանում մեր հնարավոր հաջողությունը կոգևորի շատերին: Մեր մարզադաշտում արդեն տեղադրվել են միջազգային ստանդարտներին համապատասխան լուսատախտակ և դարպասներ»:
Ներկայացվեցին թիմի համալրած լեգեոներները: Ըստ Սամվել Պետրոսյանի՝ Լուբամբո Մուսոնդան, Ացամազ Բուրաևը, Դամիր Մեմովիչը, Անդրեյ Ստոևը, Գոգիտա Գագատիշվիլին և Վբեյմարը բավականին լավ տպավորություն են թողնում:
«Գանձասար» ՖԱ, մամլո ծառայություն
Ֆոտոռեպորտաժը՝ Հակոբ Բերբերյանի