Ազատության հրապարակում այսօր՝ ժամը 19։00-ին, հանրային քննարկում է լինելու սահմանադրական փոփոխությունների թեմայով: Ներկայացվելու են դրա դեմ պայքարի ուղղությունները:
Հանրային քննարկմանը մասնակցելու հրավերին «Ֆեյսբուք» սոցիալական ցանցում արձագանքել էին ոչ միայն քաղաքացիական մի շարք նախաձեռնությունների, ՀԿ-ների անդամներ, այլև անկախ մասնագետներ՝ իրավաբաններ:
«Առաջին լրատվական»-ի հետ զրույցում «Սարգսյան իրավաբանական խումբ» իրավաբանական միավորման ղեկավար Տիգրան Սարգսյանը ասաց, որ մասնակցելու է քննարկմանը, քանի որ սահմանադրական փոփոխությունների շուրջ լայն հասարակական քննարկումները անհրաժեշտություն են: «Յուրաքանչյուր քաղաքացի պետք է ջանք չխնայի իր հնարավորության սահմաններում իրազեկ լինելու համար: Այն, ինչ հրապարակվել է, կարծում եմ՝ լուրջ վերանայման կարիք ունի: Փոփոխությունները պետք է սահմանվեն ոչ թե վերևից, այլ հասարակության կողմից: Ճիշտ չեն այն պնդումները, թե հասարակ քաղաքացիները չեն կարող լավ հասկանալ սահմանադրական փոփոխությունների նախագծի մի շարք դրույթներ»,- ընդգծեց նա:
Ըստ Տիգրան Սարգսյանի՝ սահմանադրական փոփոխությունների նախագծի մի շարք դրույթներ պայթյունավտանգ են, պետական կառավարման համակարգում խոր ճգնաժամ կառաջացնեն, և այն ծանր հետևանքներ կունենա:
«Յուրաքանչյուրս լավ գիտակցում է, որ ազգային միասնություն մարմնավորելու համար անձը պետք է ընտրվի ազգի կողմից՝ ձայների ճնշող մեծամասնությամբ: Հակառակ սրան՝ նախագիծը սահմանում է, որ ՀՀ նախագահը կընտրվի ընտրիչների ժողովի կողմից: Սա լուրջ խնդիր է, առկա է պետական կարևորագույն ինստիտուտի հեղինակազրկման վտանգը»,- նկատեց իրավաբանը:
Նա շեշտեց, որ խնդիրը պետք է դիտարկել իրականության մեջ. «Ապագա ՀՀ նախագահը մոտավորապես կընտրվի այնպես, ինչպես հիմա նշանակվում է ՀՀ գլխավոր դատախազը: Նախ պետք է ԱԺ ունենալ, նոր միայն նախագահ ընտրող: Ազգային ժողովն իր որակներով շատ հեռու է պետական կառավարում իրականացնելու հնարավորություն ունենալուց. պետք է նոր Ազգային ժողով ունենալ, նոր միայն սահմանադրական փոփոխությունների հարց քննարկել»,- ասաց նա:
Տիգրան Սարգսյանի կարծիքով՝ եղած պատգամավորները չեն կարող պատգամավոր համարվել. «Արդյունքում, մենք կարող ենք ունենալ սուպեր վարչապետական, միակուսակցական կառավարման կարգ, որն աննախադեպ կլինի աշխարհում իր բացասական հետևանքներով: Կունենանք վարչապետական «բռնապետություն»,- շեշտեց նա:
Տիգրան Սարգսյանը նաև ընդգծեց, որ առաջարկվող այս սահմանադրական փոփոխությունները մարդու իրավունքների և ազատությունների սահմանափակման հաշվին պետական իշխանությունը ընդարձակելու նպատակ ունեն: «Պիտի հասարակական պահանջով սահմանադրական փոփոխությունները միտված են լինեն մարդու և քաղաքացու իրավունքների ընդլայնմանը. լավագույն տարբերակը հասարակության կողմից ինքնակազմակերպվելն ու սահմանադրական փոփոխությունների սեփական նախագիծը ներկայացնելն է»,- եզրափակեց Տիգրան Սարգսյանը: