«Չնայած որ հանրապետության նախագահն արդեն հայտարարել է, որ էներգետիկ խնդիրները պետք է հավելյալ սոցիալական բեռ չդառնան հասարակ քաղաքացիների համար, սակայն մարդիկ դեռ հստակ չեն պատկերացնում, թե ինչ է լինելու, և իրենք իրոք հոսանքի դիմաց 7 դրամ ավել չե՞ն մուծելու: Այս մասին ինձ էլ են շատ քաղաքացիներ հարցնում, ու պետք է հստակություն:
Այսօր աշխատանքային շաբաթվա վերջին օրն է, և կառավարությունը, կարծում եմ, կկարողանա ինստիտուցիոնալ որոշում կայացնել այս առթիվ: Իհարկե, շատ կարևոր է, որ հասարակ քաղաքացին, որն արդեն սոցիալական լուրջ բեռան տակ է, և հատկապես շիրակցին ու գյումրեցին, որ աղքատության եզրին են կանգնած, հավելյալ գումար չտան և չպետք է ավել վճարեն: Ու եթե հանկարծ ինչ-որ բան փոխվի, ու այդ բեռը մնա քաղաքացու վրա, մենք կրկին պատրաստ ենք պայքարի»,- նշեց գյումրեցի ակտիվիստ Կարեն Պետրոսյանը այսօր Գյումրու թատերական հրապարակում հրավիրված բացօթյա մամլո ասուլիս-հանդիպմանը:
Նա նաև անդրադարձավ ոստիկանների իրականացրած գործողություններին և հրավիրեց մարզի ոստիկանապետին՝ ցանկացած ժամանակ հանդիպելու և իրականացված գործողություններին ինչպես իրավական, այնպես էլ բարոյական գնահատականներ տալու:
Անդրադառնալով իր հանդեպ հարուցված քրեական գործին՝ Կարենը նշեց, որ իր հանդեպ դադարեցվել է քրեական հետապնդումը, և առաջիկա օրերին ինքը փոստով կստանա որոշումը գրավոր տեսքով:
