Ռուսական RIA Novosti լրատվական գործակալությանը տված հարցազրույցի ժամանակ Ռուսաստանում Թուրքիայի դեսպան Ումիթ Յարդըմը հայտարարել է, որ Ռուսաստանի արտգործնախարար Սերգեյ Լավրովը կարող է այցելել Թուրքիա, ինչը տեղի կունենա երկու երկրների նախագահներ Վլադիմիր Պուտինի և Ռեջեփ Էրդողանի բանակցությունները նախապատրաստելու շրջանակներում։
Դեսպանը հավելել է, որ այցի ստույգ ժամկետը դեռ հստակեցված չէ և կախված է նաև Թուրքիայում նոր կառավարության ձևավորումից. «Մեր առաջնորդի այցից առաջ անհրաժեշտ է երեք հիմնական այց նախարարական մակարդակով։ Հենց դրանց արդյունքներն էլ մենք պետք է ներկայացնենք մեր երկրների ղեկավարությանը։ Եթե խոսենք արտգործնախարարների բանակցությունների մասին, ապա մենք ակնկալում ենք պարոն Լավրովի այցը, սակայն ժամկետը հստակեցված չէ»։
Թուրք դեսպանը նախապատրաստական մյուս քայլերի թվում նշել է երկու երկրների էներգետիկայի նախարարների հանդիպումն ու ռուս-թուրքական հասարակական ֆորումի անցկացումը, որոնք կարող են տեղի ունենալ ամռան վերջին կամ աշնանը։
Դիվանագետը չի բացառել, որ այդ ժամկետներում կարող են ուղղումներ կատարվել Թուրքիայում նոր կառավարության ձևավորումից հետո։ Թուրքիայի նախագահի ռուսական այցը կարող է տեղի ունենալ աշնան վերջին։
Ումիթ Յարդըմը հերքել է ԶԼՄ-ների տարածած այն տեղեկությունը, թե «Թուրքական հոսք» գազատարի վերաբերյալ ռուս-թուրքական բանակցությունները մտել են փակուղի։ Նա ընդգծել է, որ այդ բանակցությունները շարունակվում են՝ ուշադրություն հրավիրելով այն բանին, որ այդ նախագծի շուրջ պաշտոնական բանակցությունները չեն էլ սկսվել։